Lakers, Pistons, Thunder, Wolves 3-0 na

CEBU, Philippines — Ang Los Angeles Lakers, Detroit Pistons Oklahoma City Thunder ug Minnesota Timberwolves miligid ngadto sa ikatulo nilang sagunson nga daog sa 2026-27 NBA season kagahapong adlawa.

Si Luka Doncic mipaulbo og 52 puntos sa dihang ang Los Angeles Lakers nimintinar sa perpekto nilang sinugdanan uban ang 132-123 nga kadaogan batok sa Utah Jazz. Dako sab og naambag si Austin Reaves nga mibirada og 29 puntos alang sa Lakers nga hapsay ang dagan sa kampanya bisan og wala na si LeBron James uban kanila.

Sa laing bahin, si James ug ang Philadelphia 76ers napildi sa unang higayon human sila gipahagba sa Detroit Pistons, 106-93.

Si Cade Cunningham mipabuto og 26 puntos alang sa Pistons, nga 3-0 na sab sama sa Lakers.

Sukwahi kaayo ang nadangatan sa New York Knicks, nga naparot sa ikatulong sunod-sunod nga higayon human gipasukarap sa Orlando Magic, 111-102. Mao kini ang labing bati nga sinugdanan sa usa ka defending champions sukad sa Dallas Mavericks niadtong 2011.

Si Franz Wagner mitagak og 21 puntos sud lamang sa ikaupat nga kuwarter aron tabangan ang Magic pagkulit sa una nilang daog.

Sa ubang mga resulta, si Shai Gilgeous-Alexander mipatuasik og 34 puntos aron ibandera ang Oklahoma City Thunder ngadto sa 108-101 nga pagpakaging sa LA Clippers, samtang si Anthony Edwards mihipos og 26 puntos sa dihang gidagit sa Minnesota Timberwolves ang Toronto Raptors, 117-94.