Gikinahanglan pa Ba ang Milagro?

Basaha: Lk. 11;29-32

Bisan pa man kun ang atong Ginoo ang gipunsisokan og daghang mga tawo sa panahon nga siya manudlo ug mag-ayo sa mga daghang balatian ug bisan daghang mga yawa na nga iyang gipapahawa apan daghanan gihapong mga tawo ang buot makakita nga mohimo siya og milagro agig pagmatuod nga pinadala gyud siya sa Dios.

Apan bisan pa man kun kadto mamahimong kahigayonan aron mapamatud-an ni Kristo Jesus ang iyang kredibilidad apan wala siya mokaon sa ilang paon. Imbis mohatag og miilagro iyang gisaysay ang nahitabo sa kinabuhi ni Propeta Jonas ingon man alang sa Rayna nga nipanaw og Katunga sa kalibutan makapaminaw lamang sa makinaadmanong pagtulon-an ni Hari Solomon.

Ang milagro dili man kadtong maisip natong dili kasarangan.

Moulan og mga rose petals o dili ba kaha mga panghitabo sa dancing sun. Mas mahinungdanon nga angayan natong hisabtan nga ang tinuod nga Milagro magdala og kausaban sa kinabuhi sa tawong hingtungdan.

Nga human siya mamilagrohi mas mahimo siyang duol pa ngadto sa Ginoo ug pinaagi kaniya mamahimong duol ang mga tawo ngadto sa Ginoo ug dili kaniya nga nihimo og mga Milagro kuno.

Kun tinud-anay kitang nahigugma ngadto sa Dios wala na kinahanglana ang pagmatuod sa iyang gahum. Kini tungod kay ang paghunahuna kaniya ug pagsimba kaniya usa naman ka dakong grasya nakapatubo nato ug nakapahamtong kanato ingon nga katawhan nga niambit sa iyang kahingpitan.