Transport strike wa kapiog

CEBU, Philippines — Miresulta sa partial paralysis sa pipila ka dagkong rota sa Cebu ang tunga sa adlaw nga transport strike nga gipahigayon sa mga drayber kagahapon Martes,  Sept. 29, sumala pang PISTON-Cebu president Greg Perez.

Apan kung ang kagamhanan sa Cebu City maoy pasultihon, wala ra makapiog sa transportasyon sa siyudad ang maong transport strike.

Matud ni Perez, gibana-bana nga 50 porsyento ang kinatibuk-ang pagka-paralisa sa mga ruta sa transportasyon sa Cebu, samtang miabot sa 80 porsyento ang disruption sa pipila ka lugar.

Lakip sa naapektuhan ang mga rota sa Consolacion-Cebu City ug Talamban-Cebu City. Sa Talamban route, mga 30 porsyento sa operasyon ang naapektuhan tungod sa

Matud ni Perez, mga alas-9 sa buntag nagsugod ang grupo sa pagpanghipos sa mga sakyanang miapil sa strike ug mipadulong sa culminating activity ug martsa gikan sa P. del Rosario paingon sa Colon.

Yangungo

Natapos ang programa mga udto bisan pa sa pag-ulan. Lakip sa mga gipangayo sa grupo ang mas taas nga sweldo alang sa mga mamumuo, living income alang sa mga drayber, ug P55 nga rollback sa presyo sa gasolina.

Gipangayo usab sa grupo ang pag-repeal sa Oil Deregulation Law ug pagtangtang sa excise tax sa mga produktong petrolyo.

Gisuportahan usab sa PISTON ang nasyonalisasyon sa industriya sa lana ug ang pagbalik sa Petron sa kontrol sa gobyerno, nga matud ni Perez, makatabang sa gobyerno sa pag-regulate sa presyo sa gasolina. Wala nay transport strike karong adlawa.

Buses Namalik  

Si Cebu City Councilor Dave Tumulak , chairman sa disaster committee sa siyudad miingon nga basi sa ilang na-monitor sa CCTV, daghan ra gihapong pasaheroan ang namasahero.

Wala gani na makadagan ang giandam nga mga provincial buses nga mao untay pasakyan sa mga matanggong nga pasahero. Ang walo ka buses sa siyudad gi-deploy alas 6 palang sa buntag apan nibalik dayun sa garahian kay daghan mang namasaherong jeepneys.

Matud pang Tumulak, wala moapil ang mga dagkong transport groups ug mga kooperatiba sa protesta.

Seguridad

Tungod sa transport strike gipakusgan sa Police Regional Office 7 (PRO7) ang pagbantay sa seguridad  sa tibuok Central Visayas ilabi na sa Cebu samtang magpadayon ang duha ka adlaw nga transport strike nga nagsugod niadtong Septiyembre 29 ug matapos karong Septiyembre 30.

Gilauman nga maapektuhan sa strike ang pipila ka public utility vehicles (PUV) sa nagkadaiyang rota, nga mahimong hinungdan sa mas taas nga oras sa paghulat, pagdaghan sa mga pasahero, pagsamot sa trapiko ug posibleng pagkaantala sa transportasyon sa pipila ka lugar.

Gipahigayon ang security measures sa strategic areas, major roads, transport terminals ug mga lugar nga kasagarang pundokan sa mga commuter aron motabang sa publiko ug masiguro ang luwas nga paglihok sa mga pasahero ug motorista.

Sa Metro Cebu, giandam usab ang mga kapulisan alang sa mga kalihokan nga may kalabotan sa transport strike.

Matud ni Police Lt. Col. Gerard Ace Pelare, deputy city director for operations sa Cebu City Police Office (CCPO), naay mga polis nga ipakatap aron pagsiguro sa seguridad sa mga partisipante sa rally ug dili aron sila babagan sa pagpahigayon sa protesta.

Giawhag sa PRO7 ang mga commuters nga kinahanglan mobiyahe karong Septiyembre 30 og mas sayo kaysa naandan ug mokonsiderar sa mga available nga alternatibong paagi sa transportasyon.

Gidasig usab sila nga makig-coordinate sa pamilya o mga kauban alang sa posibleng sakay ug magmonitor sa mga opisyal nga pahibalo sa dili pa mobiya sa ilang mga panimalay.

Ang mga adunay dili importanteng biyahe gidasig nga ikonsiderar ang pag-adjust sa ilang travel schedule aron malikayan ang mga panahon nga limitado ang transportasyon.   

Tinabangay

Gihangyo ni PRO7 Regional Director PBGen Arnold E. Abad ang mga commuter ug transport sector nga magpabiling kalmado, kooperasyo ug matinabangay tungod sa strike.

Gipasabot sa PRO7 nga gitahod sa Philippine National Police ang constitutional right sa peaceful assembly ug expression. Gisiguro usab sa kapulisan nga respetado ang katungod ug kaluwasan sa mga nagprotesta, commuter, motorista ug ubang miyembro sa publiko.

Giawhag sa PRO7 ang publiko nga mosalig sa verified information gikan sa mga government agency ug local authorities ug likayan ang pagpakaylap sa wala mapamatud-ang mga report nga mahimong hinungdan sa kalibog o kabalaka.                                                                 

Nakulangan

Kagahapong adlawa, nag-rollback ang presyo sa lana og abot P7.50 kada litro, pero para sa mga drayber wala kini makabawi sa nangaging mga pagsaka sa presyo sa lana. Niadto sab adlaw nga Lunes, gipatuman sa Land Transportation Franchising and Regulatory Board ang piso nga usbaw sa pletihan sa traditional jeepneys ug P2 sa modern PUVs, apan para sa Piston Cebu, kuwang gihapon ni.Gusto nila nga P10 gyud ang umento,  P1,200 nga national living wage,  pagtangtang sa VAT ug excise taxes sa petrolyo, pagbalik sa pump prices hangtud P55 kada litro  ug pag-repeal sa Oil Deregulation Law. --  Shiela Mae Agrabio/IBM BANAT NEWS