Petecio, Paalam susuntok ng semis spots

MANILA, Philippines — Target nina Olympic medalists Nesthy Petecio at Carlo Paalam na masiguro ang puwesto sa semis sa pagharap sa magkaibang laban ngayong araw sa 20th Asian Games boxing competitions sa Nishio Gymnasium sa Nagoya, Japan.

Sakaling pumasok sina Petecio at Paalam sa semis, makasisiguro na sila ng tansong medalya para sa Team Philippines.

Subalit hindi magiging madali ang lahat para sa dalawang Pinoy bets.

Makakaharap ng Tokyo Olympics silver medalist at Paris Olympics bronze medalist na si Petecio sa quarterfinals si Yang Chengyu ng China sa women’s 60kg division.

Nakatakda ang bakbakan nina Petecio at Yang sa alas-4:30 ng hapon.

Nakapasok si Petecio sa quarterfinals matapos itarak ang impresibong referee-stopped-contest sa kanyang opening match noong Sabado laban kay Mays Alreem Abukhadijah ng Jordan.

Ilang edisyon na ng Asian Games nakakawala sa kamay ni Petecio ang podium. Kaya naman desidido ito na ibuhos ang lahat ng kanyang lakas upang masiguro ang podium finish.

Sa kabilang banda, handa rin si Tokyo Olympics silver medalist Paalam na gawin ang lahat para makapasok sa semis ng men’s 55kg class.

Mapapalaban din si Paalam dahil makakaharap nito si Zhang Jiamao ng China.

“Gagawin ko yung best ko. Lahat naman kami ensayado dito. Sana manalo po,” ani Paalam.