EDITORYAL - Libreng wi-fi, hain naman?

Bilyones ka pesos ang naalkansa sa gobiyerno sa mismo sa katawhang Pilipino gikan aning mga serbisyong gibayaran para magamit apan diay to wala mapahimusli og tinuod sa mga tawo.

Dili lang diay mga pagpangawat sa pundo sa flood control ang nadiskubrehan karon sa gobiyerno, hasta pud kanang gitawag og ‘ghost internet scheme’ o gialegar nga mga iregularidad sa connectivity programs sa gobiyerno.

Ning bag-o, nadiskubrehan ug giimbestigar karon sa Office of the Ombudsman ang maong binuang. Sentro sa imbestigasyon ang Department of Information and Communications Technology (DICT).

Bilyones ka pesos ang gibayad sa gobiyerno gikan sa pundo sa publiko apan nadiskubrehan nga outdated, overpriced, o ba kaha wala gyud moabot ang gibayaran na nga softwares.

Apil sa imbestigahon karon ang programa unta sa gobiyerno nga Free wi-fi nga giingong nabayran na sad sa gobiyerno apan software ray giinstalar pero walay koneksyon sa internet.

Hagbay ra man ni gianunsyo sa gobiyerno nga naa nay libreng wi-fi para sa tanan, pero wala man kini natagamtami sa katawhan karon.

Kadako unta og tabang para sa mga Pilipino kung malibre na ta sa wi-fi, ilabi na sa mga estudyante kansang mga ginikanan maglisud og hatag pirme og pang load.

Tingali, nahadlok ang mga telcos kay basin tungod ana wala nay mopalit sa ila og load, ilabi na sa mga lugar diin daghan silang subscribers sama sa mga dagkong siyudad ug mga lugar nga daghang mga tawo.

Gawas pa ana, naa pay daghang mga serbisyo ang gobiyerno nga nigamit internet access nga posibleng apil pud sa gibinuangan.

Pero dili ba dapat ang DICT isip departamentong gitahasan para aning kabahin sa komunikasyon ug internet mao man untay mo-monitor ug mobantay ug mosiguro nga maka-access ang katawhang Pilipino sa internet?

Nag-unsa ra diay sila? Nagmika sa ilang pwesto? Maayo tingaling palawman sa Ombudsman ang imbestigasyon bahin ani kay malagmit naay mga opisyales sa gobiyerno nga kakunsabo aning maong binuang.

Husto ang panawagan sa Malacañang sa mga investors nga gikuha sa gobiyerno para aning mga proyektoha, ayaw abusoha ang kaayo sa gobiyerno.

Kompleto ang gibayad apan wala nila gihatag ang serbisyong gibayran para sa mga tawo. Manubag ang angay manubag.