Gi-plamingko patay

CEBU, Philippines — Patay ang usa ka 45-anyos nga construction worker human siya gidunggab sa usa ka lalaki samtang nagsakay og motorsiklo sa Sitio Lower Tawog, Barangay Valladolid, Carcar City, niadtong Huwebes sa buntag, Agosto 6.

Nadakpan ra sab dayun sa kapolisan ang suspek atol sa hot pursuit operation paglabay sa upat ka oras ug gikatakdang pasakaan og kasong murder ug attempted murder tungod sa suway pud niya pagdunggab sa kauban sa biktima. Sa imbestigasyon sa Carcar City Police Station, nahitabo ang insidente mga alas-8:30 sa buntag. Giingong nagmotor ang biktima uban sa iyang kauban sa dihang migawas kalit ang suspek gikan sa kawayanan ug giatake siya.

Naigo ang biktima sa wala nga bahin sa iyang lawas duol sa ilok gamit ang usa ka “plamingko” ug gisunod og dunggab ang kauban niini apan nakalikay kini ug nakadagan ug nakapangayo og tabang. Patay na kini pag-abot sa tambalanan.

Mga alas-11:50 sa buntag nadakpan ang suspek nga nagsakay og motorsiklo sa Sitio Pajo, Barangay Valladolid.

Matud ni Police Lieutenant Colonel Arwen DS Nacional, hepe sa Carcar City Police Station ilaha pang gisubay kun unsay motibo sa maong pagpatay.— IBM BANAT NEWS