Lapu-Lapu LGU nihimakak sa pasangil sa MARU

CEBU,  Philippines —  Gihimakak sa Lapu-Lapu City Government ug sa organizer sa IRONMAN 70.3 Philippines in Cebu ang alegasyon nga adunay pagpangdakop ug pagpatay  sa mga libudsuroy nga mga iro sa siyudad sa dili pa ang triathlon nga ipahigayon karong Agosto 9.

Sa pakighinabi sa Banat News, giingon sa Lapu-Lapu City Public Information Office (PIO) nga walay nahitabong euthanasia sa mga iro ug iring atol sa IRONMAN ubos sa administrasyon sa mga Chan, sukad pa sa kanhi mayor ug karon Kongresista Junard “Ahong” Chan hangtod sa kasamtangang Mayor Ma. Cynthia “Cindi” King-Chan.

“There is no history that the city government under the Chan administration euthanized dogs and cats during and after the IRONMAN event in the city,” matUd ni PIO Head Mark Bautista. Hinuon, ang Lapu-Lapu City Government miingon nga andam kini makigdayalogo sa Mayari Animal Rescue Organization (MARO) aron mapalig-on ang kolaborasyon sa pagdumala sa mga hayop sa siyudad.

Tubag ni sa siyudad human ang animal welfare group nga MARO nanawagan nga ipahunong na sa siyudad ang giingong pagpanakop ug pagpatay sa mga madakpang libudsuroy iro sa dili pa ang Ironman 70.3 Philippines sa Cebu.

Sa usa ka post sa social media, namasangil ang MARO dugay na kining gibuhat sa siyudad sulod na sa 14 ka tuig.

Giawhag usab sa MARO ang publiko nga mopirma sa ilang online petition nga sakit sa ilang kasingkasing matag higayon nga moabot ang IRONMAN.

“Because we know what’s coming… Back in 2012, MARO was born out of pure horror,” matud pa sa grupo.

 “The city was impounding hundreds of dogs — just clearing the streets for the event. And they were killing them. Week, after week. In a gas chamber. We managed to rescue over 70 dogs in those few months, but even while we were pulling them out, the killing didn’t stop,” dugang pa niini.

Nipagawas usab ang MARO og online petition ug giawhag ang mga residente sa Lapu-Lapu, mga atleta sa IRONMAN, volunteers, sponsors ug spectators nga mopirma ug mopakaylap niini nga nag-ingon nga ang internasyonal nga lumba “shouldn’t be about clearing the streets of innocent animals.”

Matud sa organisasyon, pipila na ka tuig ang milabay sukad gilusad ang maong petition apan wala pa kini makab-ot og 4,000 ka pirma.

“But for those of you who can’t join our rescues, who can’t foster or donate — this is your chance. You don’t have to get your hands dirty. All you have to do is sign and share. That’s it. That’s your way of being a voice for these dogs,” matud sa MARO.

Samtang si Sunrise Events Inc. President ug General Manager Princess Galura miingon nga wala sila makadawat og bisan unsang report o impormasyon kabahin sa giingong pagpanakop o pagpatay sa mga iro nga adunay kalabotan sa lumba.

“We have never heard or been informed of such an issue. 2012 was a long time ago, different leadership, different race course,” matud ni Galura.

Midugang siya nga sulod sa ilang mga tuig nga pakigtambayayong sa Lapu-Lapu City Government ubos sa mga Chan walay isyu o apil na kining pasangil nga pagpanakop ug pagpatay sa mga iro.

“We are all dog lovers,” matod niya.

Gipahimangnoan usab ni Galura ang komunidad, ilabina ang mga residente nga adunay mga binuhi duol sa race route sa Barangay Punta Engaño, nga ibutang ang ilang mga iro sulod sa balay atol sa run portion sa lumba.