PBA mogamit sa FIBA rules

CEBU, Philippines — Dunay laing paagi ang PBA pagpakita sa ilang suporta alang sa nasudnong kawsa.

Sugod sa Governors’ Cup karong Hulyo, hinay-hinay nga ipatuman sa liga ang mga lagda sa FIBA sa ilang mga duwa isip kabahin sa hugtanon nilang pagsuporta sa programa sa Gilas Pilipinas. Gipahibawo kini ni PBA commissioner Willie Marcial atol sa usa ka coaches’ meeting ning bag-ohay pa lamang.

Sagad sa mga kausaban makaapekto sa officiating, nga magsubay na karon kon giunsa pagtawag ang mga torneyo ubos sa FIBA. “Magbabago tayo next conference ng tawagan,” matud pa ni Marcial. “Much closer (to FIBA officiating).”

Ang makabenepisyo ning dalaygon nga lakang mao mao ang mga players nga sakop sa Gilas Pilipinas pool. Makatabang kini aron mapamilyar sila kon giunsa pag-officiate ang kompetisyon sa internasyonal nga bantawan.

“Yung adjustment kasi talagang malayo. Every time we play (internationally), iba yung fouls dito (PBA) and iba yung fouls doon (FIBA). We’re just adjusting middle of the game na,” paambit pa ni Gilas Pilipinas program director ug team manager Alfrancis Chua.

“Minsan sobrang physical sila, minsan naman mahipan mo lang, foul na,” dugang pa ni Chua. “So we need to adapt. We’re just thinking to at least help the players who are playing for Gilas.” Ipabilin hinoon sa PBA ang unom ka fouls sa mga players, upat ka tag-12 ka minuto nga kuwarter, ang gidugayon sa timeouts, ug ang 4-point line.