El Clasico Deux gitakda karong weekend
CEBU, Philippines — Ang Sacred Heart School-Ateneo de Cebu ug Don Bosco Cebu molab-as og balik sa ilang panagkaribal alang sa mahinundanong kawsa uban sa pagpahigayon sa El Clasico Deux karong Sabado, Hunyo 27, sa Dynamic Herb–Borromeo Sports Complex sa South Road Properties.
Nagmalampuson ang unang El Clasico nga giduwa sa Cebu City Sports Center sa miaging tuig maong gipadayon kini sa mga organizers nga gipangulohan ni Chad Songalia.
Sa una nilang panag-abot, gipakyaw og daog sa mga Boscoanians ang tanang tulo ka duwa gikan sa elementary hangtud sa alumni category.
Mao nang ang mga Ateneo Hearters ubos sa pagtimon ni coach Jun Santillan nanghinaut nga makabawos sa Don Bosco ning higayon.
Magsugod ang aksiyon pinaagi sa duwa sa elementary division sa ala-1 sa hapon ug pagasundan kini sa sangka tali sa mga high school teams sa alas-3 sa hapon.
Sa main game sa alas-5 sa hapon, ang mga alumni na sa duha sa kampo ang magbangga.
Ang Don Bosco alumni magsandig sa mga propesyonal nilang players nga naglangkob nilang Joseph Kei Ceniza ug Tam-tam Ramos sa Cebu FC ug Kenry Balobo sa Maharlika FC. Samtang ang SHS-Ateneo moparada sa ilang mga produkto nga mihimo og kasikas sa UAAP ug NCAA.
Ang mga tickets nagkantidad og P150 ug mapalit kini sa Dynamic Herb ticket booth as adlaw sa kalihukan.
- Latest
