Sa pagpapatuloy ng kwento ko nung Linggo,
After my son had paella na may kuneho,
‘Di naman nagtatalon sa sarap si Jako,
Meron lamang akong natalunan na kwento.
Nang sa Museo Reina Sofia’y napunta
Para makita nang harapan ang “Guernica,”
May isang obrang kay ganda ng paalala —
Roberto Jacoby tungkol kay “Che” Guevara.
Sikat na mukha ni “Che” hinalimbawa n’ya
At may mga nakatitik sa karatula
At kung nanamnamin ang katas n’ya talaga —
‘Wag nating kalimutan tunay na laban n’ya.
“Un guerillero no muere para que se lo
Cuelgue en la pared” — ang nilalaman nito,
May patama’t tampo na isa daw sundalo
‘Di lang namatay upang pandekorasyon n’yo.
Si Che kasi’y isa sa pinaka-popular
Na mukha sa T-shirt, sa poster, maging sa bar,
At kung si Jacoby man may munting “pang-asar,”
Sa mga fashionista ay wala ‘yang lugar.
Nasirang John Lennon ng Beatles ay isa pa,
Tadtad na rin mukha sa mga kamiseta,
Wala na rin siyang habol kung maninita
Sapagkat wala na rin si John na hininga.
Para sa iba ‘yan lang daw ay pag-alala,
‘Di tulad ng sa ilan na mga buhay pa,
Pero sa T-shirts mukha na’y nakabalandra,
Sila’y mga mandirigma sa pulitika.
At nuong isang Martes, Mayo veinte-cuatro,
Nang ako’y dumalaw sa Museo del Prado,
May isang iskulturang natulala ako,
Pinakamatindi nang obrang nakita ko.
Nakita ko nang lahat sa mga lakbay ko,
Mga Leonardo Da Vinci’t Michelangelo,
Isama pang lahat pati pinta kung gusto,
Sa lahat na ng nakita ko ito UNO!
Ako’y sigurado na marami sa inyo
Ang hindi pamilyar sa obra maestrang ito,
Kaya ang maganda lumipad na lang kayo
Duon sa Madrid at humusga na lang mismo.
“Isabella Segunda” aking sinasabi,
Inukit ng isang Camilo Torreggiani,
Busto ng isang nakalambong na babae,
Mabuting ang mata n’yo na lang ang magsabi.
Masasabi kong ang paglalakbay na ito,
Punong-puno ng arte’t sining sa totoo,
May gabing nagta-tapas habang may flamenco,
Pero ang panalo ang nitso ng tatay ko!
Tama’t exactamente ang nabasa ninyo,
Porque ang mi Papa ay nakalibing dito,
At nang dinalaw ko sa kanyang sementeryo,
Imbes na mag-seryo ay napatawa ako.
At bakit naman hindi pagkat nakita ko
May mga bulaklak nakapintang disenyo,
Sa totoo lang cute na cute lumabas ito,
Bagay din sa kanya’t ibang klase erpats ko.
Kunsabagay ‘di naman n’ya utos siguro,
Bunso n’yang si Beatriz ang dumiskarte nito
Kaiba rin ang utak ng utol ko dito,
I say — isa s’yang Kastilaloy — Pinoy henyo!