Sikyu nga nipatay sa pharmacist nadakpan
CEBU, Philippines — Human sa walay hunong nga hot pursuit operation, nadakpan sa kapulisan ang giingong suspek sa pagpatay sa usa ka pharmacy assistant diha sa Lutopan, Toledo City, Cebu, pasado alas 5:30 sa hapon, Miyerkules, Nobyembre 11, 2026.
Giila ang nadakpan nga si Jerome Sumayang Abella, 37 anyos, usa ka security guard ug residente sa Back Paseo Arcenas, Barangay Tisa, Cebu City.
Sumala sa Cebu City Police Office (CCPO), nadakpan ang suspek pinaagi sa padayong operasyon nga gipangunahan ni Police Major Noah Labra Añana, hepe sa Police Station 6, uban ni Deputy for Operations PLT Jason M. Aparici, SWAT ug ubang personnel sa CCPO.
Atol sa operasyon, narekober usab sa kapulisan ang usa ka armas nga gituohang gigamit sa pagpamusil.
Atol sa press conference , gibutyag ni Police Lieutenant Colonel Gerard Ace J. Pelare, Deputy City Director for Operations (DCDO) sa CCPO, nga wala nila giundangan ang pagpangita sa suspek.
Ang mga operatiba sa Police Station 6 ug sa mga supporting operating units nagtinabangay sa pagsunod sa mga impormasyon bahin sa lokasyon sa suspek hangtud nga nadakpan kini.
Gidala na ang nadakpan ngadto sa estasyon sa kapulisan alang sa pagpasaka og kaso ug dugang nga imbestigasyon. (BANAT NEWS)
- Latest
