Tutol sa undergrad na bf

Dear Dr. Love,

Ako po si A, 22-anyos. May boyfriend po ako, 3 years na kami. Mabait, masipag at responsable po siya, pero hindi po siya nakatapos ng pag-aaral. Tumigil siya ng 2nd year college para tumulong sa pamilya niya.

Ayaw po sa kanya ng parents ko. Simula nung nalaman nilang undergrad siya, sabi nila wala raw akong future sa kanya at dapat daw graduate ang mapangasawa ko. Masakit po kasi hindi ko naman minahal ang diploma niya, minahal ko ‘yung tao. Pero mahal ko rin po ang magulang ko.

Ngayon pinapahiwalay na nila ako. Si J naman nahihiya na at pakiramdam niya wala siyang kwenta. Dr. Love, mali po ba na mahalin ang taong hindi nakatapos? Paano ko po sila paglalapitin nang hindi ko kailangang mamili?

A

Dear Ms. A,

Hindi ka mali. Hindi diploma ang sukatan ng pagiging mabuting partner. Maraming graduate pero walang diskarte sa buhay, at maraming hindi nakatapos pero kayang bumuo ng magandang future. Gayunman, hindi rin masama ang magulang mo. Hindi nila inaayawan si J bilang tao, gusto lang nilang makasigurado na hindi ka mahihirapan.

Una, kausapin mo sila, huwag mong labanan. Ipaliwanag mo na naiintindihan mo ang takot nila, pero hilingin mong bigyan si J ng chance na patunayan ang sarili sa gawa, hindi sa papel.

Pangalawa, kaila-ngang may plano si J. Hindi sapat na mabait lang. Dapat makita ng magulang mo na nagsisikap siya — may maayos na trabaho, may ipon, at may pangarap na mag-aral ulit kahit TESDA o part-time. Ang respeto, pinaghihirapan.

Pangatlo, huwag ka-yong magtago. Lalo lang masisira ang tiwala.

Bigyan nyo ng oras. Kung talagang kayo, hindi susuko si J dahil lang sa pagtutol. Magsisipag pa siya para ba-
lang araw, siya mismo ang ipagmalaki ng magulang mo.

Ipaglaban mo siya nang mahinahon.

DR. LOVE