11-anyos tinangay ng baha

MANILA, Philippines — Patay ang isang 11-anyos na bata matapos na tangayin ng baha Sabado ng hapon sa Brgy. Canumay West sa Valenzuela City.

Sa pagsisiyasat ng Valenzuela City Police, nangyari ang insidente bandang alas-2:35 ng hapon nitong Sabado sa isang creek malapit sa Bahay Kalinga sa R Jacinto St. ng nabanggit na barangay.

Nabatid na nasa tabi ng creek ang biktima kasama ang isang kaibigan sa kasagsagan ng baha. Nang dumaan ang truck, inanod ito dahil sa malaking alon. Tinangka namang saklolohan ng kanyang kaibigan ang biktima subalit mabilis na itong inanod ng ragasa ng tubig. Bandang alas-3:41 ng hapon na nang makuha ang bangkay ng biktima sa creek na malapit naman sa Vente Kalye Tapsilog, Raminel Subdivision, T. Santiago St., Brgy. Veinte Reales, Valenzuela City. Idineklara itong dead-on-arrival sa ospital.