Ipinagkalat na buntis

Dear Dr. Love,

Ako po ay isang dalagang ina, 17 taong gulang. Napilitan huminto sa kursong Nursing matapos mabuntis ng aking boyfriend. Nang malaman niyang dalawang buwan na ang aking tiyan, iniwan niya ako. Dahil dito, nakaranas ako ng matinding depresyon. Lalong lumala ang aking kalagayan nang ipagkalat ng pinsan ko ang aking pagbubuntis. Naging tampulan ako ng tsismis sa school at sa aming lugar. Masakit dahil inaasahan kong siya ang dadamay sa akin, pero siya pa ang nagpakalat ng aking pinagdadaanan.

Mabuti na lang at patuloy akong sinusuportahan ng aking mga magulang. Pero hanggang ngayon, hindi ko mapatawad ang pinsan ko. Sa sobrang galit, gusto ko pa sanang gumanti. Tama ba ang nararamdaman ko?

Richie

Dear Richie,

Ang nararamdaman mong galit at hinanakit ay likas at normal, lalo na’t galing ito sa taong inaasahan mong kakampi. Hindi madali ang sitwasyon mo, kaya’t huwag mong sisihin ang sarili kung hindi mo pa kayang magpatawad.

Gayunman, tandaan mo na ang pinakamahalaga ngayon ay ang iyong kalusugan at ang pagbubuntis mo. Doon mo ilaan ang iyong lakas at atensyon.

Ang mga tao, kahit kamag-anak, ay hindi mo laging mapapasaya o mapapaniwala. Ang magagawa mo ay patunayan sa sarili mo na kaya mong bumangon at maging mabuting ina.

Kung hindi mo pa kayang magpatawad, hayaan mo muna. Darating ang panahon na gagaan ang loob mo. Sa ngayon, sikapin mong palibutan ang sarili ng mga taong tunay na nagmamahal at sumusuporta sa iyo. Ang pinakamabisang sagot sa tsismis ay ang tahimik na pagpapatuloy ng buhay nang may dignidad.

Dr. Love