Nasa isip pa rin ang ex

Dear Dr. Love,

Ako po si Jell. Magandang araw po. Isa po akong simpleng babae na hanggang ngayon ay hindi pa rin maintindihan ang sarili.

Mahigit isang taon na kaming hiwalay ng ex-boyfriend ko, pero parang sariwa pa rin ang lahat.

Akala ko kapag lumipas ang panahon, kusa na lang mawawala ang sakit. Pero bakit ganito, Dr. Love? Bakit hanggang ngayon, siya pa rin?

Sinubukan ko nang magpaka-busy. Lumabas kasama ang kaibigan, nag-focus sa tra-baho, at minsan nagpapanggap pang masaya sa social media.

Pero sa tuwing mag-isa na ako, bumabalik lahat ng alaala. ‘Yung simpleng tawanan namin, ‘yung mga pangarap naming dalawa, at kahit ‘yung mga away na dati kong kinaiinisan, nami-miss ko na rin ngayon.

Ang masakit pa, alam kong wala na talaga. May iba na siyang mundo at parang okay na okay na siya.

Habang ako, parang naiwan sa lumang kabanata na ako na lang ang paulit-ulit na nagbabasa.

Naiinis ako sa sarili ko kasi bakit hindi ko siya makalimutan? Kulang ba ako?

O talagang may mga taong kahit tapos na, dala-dala pa rin natin sa puso?

Minsan iniisip ko, baka hindi ko siya nami-miss… baka nami-miss ko lang ‘yung pa-kiramdam na minahal ako.

Pero bakit sa rami ng taong nakilala ko, siya pa rin ang hinahanap ng puso ko?

Jell

Dear Jell,

Normal lang ang nararamdaman mo. Ang totoong pagmamahal, hindi parang chalk na madaling burahin.

Minsan kahit tapos na ang relasyon, may bahagi pa rin ng puso natin na kumakapit sa alaala. Hindi dahil mahina ka, kundi dahil na-ging totoo ka magmahal.

Pero tandaan mo, hindi lahat ng mahal natin ay meant para manatili. May mga taong dumarating para turuan tayo kung paano magmahal, pero hindi sila ang makakasama natin habang buhay.

Hindi mo kailangang pilitin ang sarili mong makalimot agad. Ang paghilom, hindi karera. Unti-unti lang.

Darating din ang araw na maaalala mo siya nang wala nang sakit—parang lumang kanta na rati mong paborito, pero hindi mo na kayang iyakan ngayon.

At higit sa lahat, huwag mong hanapin ang halaga mo sa taong umalis. Ang babaeng marunong magmahal nang totoo ay hindi kailan man kulang.

Baka ngayon, sugatan ka lang talaga. Magmahal ka muna ulit… ng sarili mo.

DR. LOVE