Ok, pero hindi na ok

Dear Dr. Love,

Ako po si Ernest. Isa po akong lalaki na kasalukuyang nasa isang relasyon na unti-unti kong nararamdaman na parang nagbabago. Hindi na tulad ng dati ang sweetness ng girlfriend ko. Ramdam kong natatabangan na siya sa akin—kulang na ang lambing, tipid na ang mga reply, at minsan parang napipilitan na lang makipag-usap.

Ang masakit po, alam kong may problema, pero hindi niya ito masabi nang direkta. Kapag tinatanong ko siya kung okay lang ba kami, lagi niyang sagot ay “okay lang,” pero kabaligtaran ang nararamdaman ko. Parang ako na lang ang kumakapit sa isang bagay na siya ay unti-unti nang bumibitaw.

Mas gugustuhin ko sanang marinig ang totoo, kahit masakit, kaysa ganitong pinapahaba ang katahimikan na mas lalong sumasakal. Hindi ko alam kung dapat ko bang ipilit na pag-usapan namin ito o hayaan na lang hanggang sa tuluyan na siyang lumayo.

Ernest

Dear Ernest,

Masakit ang sitwasyon mo, pero mas malinaw kaysa sa iniisip mo. Kapag ang isang tao ay nagbago na ang pakiramdam pero hindi kayang aminin, kadalasan takot lang siyang makasakit—pero sa ginagawa niya nga-
yon, mas lalo ka niyang nasasaktan. Kung paulit-ulit mong tinatanong at “okay lang” pa rin ang sagot kahit malinaw na hindi, may kulang na sa katapatan doon.

Kausapin mo siya nang diretsahan, hindi para magmakaawa, kundi para malinawan. Sabihin mo kung ano ang napapansin mo at kung ano ang nararamdaman mo. Bigyan mo siya ng pagkakataong maging totoo.

Minsan, mas masakit ang hindi sinasabing katotohanan…pero mas masakit ang manatili sa isang relasyong wala na palang lalim.

DR. LOVE