Huwag mawalan ng pag-asa

Dear Dr. Love,

Magandang araw po sa inyo. Sumulat po ako ngayon na may mabigat na damdamin sa aking puso.

Kamakailan lang po ay natanggal sa trabaho ang aking mister. Hindi po naging madali para sa amin ang balitang ito, lalo na’t papalapit na ang Pasko.

Dati-rati, masaya naming pinag-uusapan ang simpleng handa at munting regalo para sa pamilya, pero ngayon po ay napalitan iyon ng pangamba at lungkot.

Bilang asawa, masakit po sa akin na makita ang aking mister na tahimik at tila nawawalan ng kumpiyansa sa sarili.

Sinisisi niya ang sarili niya at pakiramdam niya ay nabigo niya kami bilang haligi ng tahanan.

Sinusubukan ko po siyang palakasin at iparamdam na hindi siya nag-iisa, pero aminado po akong ako man ay napapanghinaan ng loob.

Hindi ko po alam kung paano ko haharapin ang mga susunod na araw—ang bayarin, ang Noche Buena, at ang tanong kung paano kami babangon muli.

Hermina

Dear Hermina,

Ang pagkawala ng trabaho ng iyong mister ay mabigat hindi lang sa bulsa kundi pati sa kanyang puso. Sa panahong ito, higit niyang kailangan ang iyong pag-unawa at suporta, hindi paninisi.

Ipaalala mo sa kanya na ang kanyang halaga ay hindi nasusukat sa trabaho kundi sa pagmamahal at pagsisikap niya para sa pamilya.

Huwag ninyong hayaang mawala ang diwa ng Pasko.

Kahit simple, basta may pagmamahalan, panalangin, at pag-asa, tunay pa rin itong masaya.

Ang pagsubok na ito ay lilipas, at may bagong pintuang bubukas sa tamang panahon.

DR. LOVE