Huwag susuko

Dear Dr. Love,

Nakulong ako dahil sa self defense. Apat na taon ang binuno, mabuti at naareglo ang kaso ko. Marami rin kasing nagrereklamo sa nadale kong tao.

Palipat lipat kami ng pamilya ko ng tirahan.  Alam naman ng misis ko na takaw-away ako. Lagi kasi akong nakukursunadahan. Siguro dahil sa itsura kong payat na aakalain mong may bisyo.

Kaya kapag magulo sa isang lugar na uupahan namin ay umaalis kami agad. Magastos lang. Mabuti mahusay sa pera ang misis ko. Lagi siyang nagtitinda ng kakanin at tumatanggap ng kahit anong sideline.

Minsan nasisisi ko na ang Diyos, bakit naging mahirap kami. May pagkakataon na gusto ko nang sumuko.

Kardo

Dear Kardo,

Tama ang misis mo, huwag kang susuko. Hindi sa lahat ng oras ay panay hirap. Basta’t manalig ka at tuloy-tuloy na magsumikap.

Dapat lang na umiwas ka lagi sa gulo. Alalahanin mo ang iyong pamilya. Humanap ka pa ng paraan para umasenso ang buhay ninyong mag-anak.

May awa ang Diyos, lalo na sa mga nananalig sa kanya.

DR. LOVE