Dalagang ina

Dear Dr. Love,

Tawagin mo na lang akong Cynthia, 21-anyos at isang dalagang ina. Pero iilan lang kaming nakakaalam ng sikreto kong ito.

Nabuntis ako ng aking boyfriend noong ako ay 15-anyos lang at iniwan ako. Kaya ako’y nagsilang sa malayo naming lalawigan at inampon ng aking second cousin ang aking anak na ngayo’y 5 taong gulang na. Pati sarili kong anak ay pinaniwala naming auntie niya ako.

Kakaunti ang nakababatid noon. Bumalik ako sa Maynila at nabuhay na tulad ng dalaga at tumanggap ng manliligaw. May iba akong naging boyfriend pero hindi ako sumeryoso.

Hanggang sumapit ako sa edad kong ito at nagkaroon ako ng boyfriend na mahal ko. Lagi niyang sinasabi sa akin na masuwerte siya dahil isang certified virgin ang kanyang girlfriend. Iyan kasi ang pakilala ko sa kanya.

 Ngayo’y niyayaya niya akong magpakasal. Hindi ako agad makasagot kahit pareho kaming nasa tamang gulang. Natatakot kasi ako dahil malalaman niya ang totoo.

Ano ang gagawin ko?

Cynthia

Dear Cynthia,

Mahirap gawin pero magsabi ka ng totoo sa kanya. Dalawang bagay lang ang puwedeng mangyari. Ang tanggapin ka niya sa kabila ng lahat o kaya’y makipagkalas siya sa iyo dahil dinaya mo siya.

Kung mangyari ang hindi magandang scenario, wala kang magagawa kundi tanggapin ito.

Alam mo, sa kalagayan mo ngayo’y wala kang dapat ilihim sa mga manliligaw mo. Kung mahal ka ng isang manliligaw, tatanggapin ka niya ano man ang iyong kahapon.

Dr. Love