Dear Dr. Love,
Magandang araw sa inyo. Problema ko ang asawa ko meron siyang babae at sa ngayon ay magkasama sila. May oras siya kung kailan siya pupunta sa kanyang babae at uuwi sa akin.
Sinabi ko sa kanya na mamili na siya kung sino sa aming dalawa ang mahal niya. At tatanggapin ko anuman ang kanyang pasya.
Tinanong ko rin siya kung mahal niya ba talaga ako. Ang sagot niya ay hindi na niya ako uuwian kung hindi na niya ako mahal. Balak niyang magsama sila ng babae hanggang anim na buwan para daw makilala niya ang ugali nito.
Ano po ang maipapayo ninyo sa akin? Minsan kasi parang gusto ko siyang iwanan dahil sa mga pinaggagawa niya. Ako po ay 27-anyos pa lamang at kami ay may dalawang anak.
Thanks,
Sagittarius
Dear Ms. Sagittarius,
Madalas kabilang sa mga pagsubok na pinagdaraan ng mga mag-asawa ang pagkakaroon ng third party. Subalit ang pananatili sa ganitong sitwasyon ay hindi makakatulong sa paglago ng isang pamilya, sa halip malaki ang tsansang masira ito.
Huwag ka muna basta sumuko gawin mo ang lahat para mabago ang paniniwala ng iyong asawa.
Kausapin mo siya ng masinsinan. Sikapin mong gawin ito nang may buong paniniwala na mababago ang lahat para na rin sa kapakanan ng inyong dalawang anak.
Dr. Love