Dear Dr. Love,
I have been an avid reader of your column for the past five years. Salamat sa magagandang kasaysayan at payong itinatampok mo para sa mga may problema sa pag-ibig na katulad ko.
Sasarilinin ko na lang sana ang problemang ito pero kailangan ko lang ang mahihingahan para maglubag ang dibdib ko.
Tawagin mo na lang akong Abner, binata at isang empleyado sa isang customs brokerage. Mayroon akong kasintahan. Tawagin mo na lang siyang Elsie. Limang buwan na ang aming relasyon. Isa siyang sekretarya sa kompanyang pinaglilingkuran ko. Mahal ko siya.
Pero nabalitaan ko na may lihim na relasyon siya sa aming boss. May edad na ang boss namin at may asawa’t mga anak. Nang tanungin ko si Elsie, matagal bago siya umamin. Pero sabi niya sana ay nauunawaan ko siya.
Ibig daw niyang mahango sa hirap. Marami silang magkakapatid at tatlo ang pinag-aaral niya. Parehong matanda na ang kanyang mga magulang at walang trabaho kaya sa kanya umaasa ang pamilya.
Nakipag-break siya sa akin at masamang- masama ang loob ko. Bakit ganoon? Ano ang dapat kong gawin, Dr. Love?
Abner
Dear Abner,
Ang dapat mong gawin ay limutin mo si Elsie. Obviously, prayoridad niya ang kanyang pamilya at handa niyang isakripisyo ang kaligayahan para sila maitaguyod.
Mali ang ginagawa niya pero igalang mo ang kanyang kagustuhan. Kalimutan mo siya at ibaling sa iba ang iyong pag-ibig. Tiyak kong makakakita ka ng iba.
Dr. Love