Kasosyo sa negosyo ni VP Sara ex-envoy ni Duterte sa China
MANILA, Philippines — Kinumpirma ng prosekusyon sa ika-28 na araw ng impeachment trial na si Jaime Tan Cruz na lumitaw ang pangalan sa dokumento ng ilang negosyo na may kaugnayan kay Vice President Sara Duterte, ay siya ring special envoy to China for trade and investments na itinalaga noong 2019 ng noo’y Pangulong Rodrigo Duterte.
Ginawa ni private prosecutor Atty. Erwin Matib ang kumpirmasyon matapos itong tanungin ni Senator-judge Erwin Tulfo. “Ito po bang si Jaime Tan Cruz is the same person na na-appoint ni dating pangulong Duterte as special envoy to China for trade and investment?” tanong ni Tulfo.
“Yes, they are the same person,” pagkumpirma ni Matib.
Si Cruz din ang parehong tao na inalok noon ni dating Pangulong Duterte na maging chairman ng Philippine Health Insurance Corp. (PhilHealth), ngunit tumanggi sa alok.
Ito ang unang pagkakataon na nabanggit sa impeachment trial ng Bise Presidente ang ugnayan ni Cruz sa dating pangulo habang sinusuri ngayon ng impeachment court ang mga interes sa negosyo ni Duterte.
Batay sa mga rekord ng Securities and Exchange Commission (SEC), kinilala si Cruz bilang incorporator ng mga sumusunod na kumpanyang iniugnay kay Duterte: City Hall King Chow Foods Corporation; Metro City Chow Foods Corporation; Great Jolly Times Foods Corporation; Davao New Royal Taipan Foods Corporation; Davao Emerging Taipans Corporation; Davao Bounty Times Foods Corporation; at JTC Group of Companies Philippines, Inc.
Sinabi ng prosecution panel na maaari rin nitong ipatawag si Cruz bilang isa sa mga testigo nito kaugnay ng alegasyon ng hindi maipaliwanag na yaman ni Duterte sa harap ng Senate impeachment court.
- Latest
