Pagpasar sa Senado sa masustansyang pagkain act gihangop

CEBU, Philippines — Gihangop sa National Nutrition Council sa Central Visayas (NNC-7) ang pagpasar sa Senado sa Masustansyang Pagkain para sa Batang Pilipino Act, nga giingong dakong kalampusan ilabina alang sa mga batang Pilipino nga kulang sa nutrisyon.

Matud ni NNC-7 Regional Nutrition Program Coordinator Dr. Archie Labordo, makatabang ang maong lakang aron maseguro nga mas daghang batang Pilipino ang makadawat og igo ug masustansyang pagkaon samtang nag-eskwela.

“Ang pagpasa sa Masustansyang Pagkain para sa Batang Pilipino Act usa ka dakong kalampusan alang sa atong mga kabataan, ilabina sa mga batang kulang sa nutrisyon,” matud ni Labordo.

Gidayeg niya ang mga nagsuporta ug mga magbabalaod tungod sa ilang paningkamot aron maseguro nga walay batang Pilipino nga magutom samtang nagtungha.

Si Senador Bam Aquino, usa sa mga nag-unang tigpaluyo sa Senate Bill No. 2272, miingon nga palapdan sa maong lakang ang National Feeding Program aron makahatag og igo ug masustansyang pagkaon sa mas daghang kabataan.

Ubos sa balaodnon, mahimong universal ang feeding program alang sa tanang estudyante gikan Kindergarten hangtod Grade 3 sa mga pampublikong eskwelahan, samtang ang mga estudyanteng kulang sa nutrisyon sa mas taas nga grado magpadayon sa pagdawat og suporta.

Gipakita usab sa maong lakang ang life-stage approach sa nutrisyon, nga naglakip sa mga interbensyon gikan sa pagmabdos ug unang mga tuig sa kinabuhi sa bata hangtod sa pagsugod niini og eskwela.

Nanawagan ang senador alang sa pagpasa ngadto sa balaod sa Masustansyang Pagkain para sa Batang Pilipino Act, nga nag-ingon nga walay bata ang angay mosulod sa eskwelahan nga gigutom. (BANAT NEWS)