HVI nakuhaag P374,000 nga shabu

CEBU, Philippines — Naaresto ang usa ka 40-anyos nga lalaki nga giila sa kapulisan nga high-value individual o HVI human makumpiskahan og gibana-banang 55 gramos sa gituohang shabu nga nagkantidad og P374,000 atol sa buy-bust operation sa Barangay Sawang Calero, Cebu City, Huwebes sa gabii, Agosto 27.

Giila ang suspek sa alias nga “Patchoy” ug nadakpan alas-10:40 sa gabii sa Magsaysay Extension, Barangay Sawang Calero sa mga sakop sa Drug Enforcement Team sa Station 6, in coordination sa Philippine Drug Enforcement Agency sa Central Visayas o PDEA-7.

Nakumpiska gikan niya ang gibana-banang 55 gramos nga gituohang shabu, nga adunay estimated standard drug price nga P374,000.

Gidala dayon siya sa Station 6 diin temporaryo siyang gipabilin samtang giandam ang pagpasaka sa tukmang kaso batok kaniya.

Nadakpan na kaniadto ang suspek tungod usab sa giingong paglapas sa Comprehensive Dangerous Drugs Act of 2002.

Pasakaan ang suspek og kaso tungod sa giingong paglapas sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002.— IBM BANAT NEWS