PHO nisusi bahin sa batang namatay

CEBU, Philippines — Nilusad og kaugalingong imbestigasyon ang Cebu Provincial Health Office (PHO) sa kamatayon sa usa ka pito ka bulan nga bata sa Dumanjug, Cebu, human nagpatungha og pangutana ang pamilya bahin sa posibleng koneksyon niini sa measles-rubella (MR) vaccination nga nadawat sa bata. Matud ni PHO chief Dr. Shiela Faciol, gipadala dayon sa ilang opisina ang usa ka team ngadto sa Dumanjug pagkadawat sa report aron mangolekta og dugang impormasyon bahin sa kaso.

Gilauman sa PHO nga makuha sa ilang team ang tanang gikinahanglang impormasyon aron matubag ang mga pangutana kabahin sa kahimtang sa bata ug sa mga panghitabo sa wala pa kini namatay.

“Nanghinaot ta nga makuha nila tanang information para makahatag ta og tubag sa atong pangutana. Kay ako pud nangutana kung unsa kaha ang instance ba,” dugang pa niya.

Sa pagkakaron, matod ni Faciol, ang nahibaloan pa lamang niya mao nga nabakunahan ang bata niadtong Agosto 10.

Ang imbestigasyon sa PHO lahi usab sa gihimo sa Department of Health-Central Visayas (DOH-7), nga nagpatuman og formal Adverse Event Following Immunization (AEFI) investigation aron matino ang mga kamatuoran sa kaso ug kung adunay direktang relasyon tali sa vaccination ug sa kamatayon.

Una nang gipatin-aw sa Dumanjug Municipal Health Office nga wala pay nahimong konklusyon kung adunay kalambigitan ang vaccination sa pagkamatay sa bata.

Sumala sa mga post sa giila nga inahan sa bata nga si Luzel Zozobrado, nadawat sa iyang anak ang MR vaccine niadtong Agosto 10 ug namatay niadtong Agosto 24. Matod niya, nagpabiling aktibo ang bata human sa vaccination.

Sa iyang post niadtong Agosto 26, gisulti ni Zozobrado nga nagsugod og pagsuka ang bata niadtong hapon sa Agosto 23, nagsige na dayun kini og hilanat nga miabot kuno og 40 degrees Celsius.

Gidala una sa pamilya ang bata sa Dumanjug Rural Health Unit apan, sumala sa inahan, wala dayon kini matambali tungod sa gidaghanon sa mga pasyente ug sa cut-off.

Tungod ani, ilang gidala ang bata sa Barili District Hospital apan kritikal na ang iyang kahimtang.

Base sa medical certificate nga gipatik sa inahan sa social media, ang immediate cause of death mao ang acute respiratory failure, samtang gilista nga antecedent cause ang septic shock ug underlying cause ang status epilepticus.

Samtang nagpadayon ang imbestigasyon, si Faciol mipasabot bahin sa importansya sa bakuna batok sa measles ug rubella ilabina sa mga bata.

“Despite gud na grabi jud sa pag sensationalized sa kadaot sa vaccine, we take note that vaccines are there, they are safe, effective nga di ta magka measles, kay  mas delikado man labaw na sa mga bata, pwede mamatay ang bata tungod sa measles,” puno pa niya. Ang MR Supplemental Immunization Activity sa DOH-7 nagsugod niadtong Agosto 10 ug gitumong sa mga batang unom ka bulan hangtod 59 ka bulan ang edad sa Cebu, Bohol, Negros Oriental ug Siquijor, lakip ang Cebu City, Lapu-Lapu City ug Mandaue City. IBM BANAT NEWS