MCWD pahatagon og refund ngadto sa mga konsumidor

CEBU, Philippines — Gihingusgan ni Konsehal Harold Kendrick Go ang refund o mahatagan og bill credit ang mga konsumidor sa Metropolitan Cebu Water District (MCWD) nga gipabayad sa minimum water charge bisan og halos wala na makapahimulos sa serbisyo ilabi na human sa bagyong Tino.

Matud ni Go nga nakadawat ang iyang buhatan og daghang reklamo gikan sa mga residente sa siyudad nga gipabayad gihapon sila sa minimum fee bisan og wala na niagas ang ilang mga gripo pila ka semana ang nilabay sukad nahitabo ang bagyo niadtong Nobiyembre 3, 2025.

Gipakita ni Go ang usa ka billing invoice nga iyang gisusi diin usa ka konsumidor adunay zero water consumption alang sa billing period gikan Disyembre 16, 2025 hangtud sa Enero 15, 2026 apan gipabayad gihapon og P235.60 nga minimum water fee ug franchise tax. Matud pa ni Go, ang mga konsumidor nga naapektohan sa qualifying interruption dili angay singlon tungod kay wala kini nakapahimulos sa serbisyo.

Nakitagbo si Go kang Local Water Utilities Administration (LWUA) Administrator Jose Moises Salonga sa Quezon City ug gihatagan siya og kopya sa LWUA Memorandum Circular 009.25 nga gipetsahan niadtong Disyembre 22, 2025 diin ang unod sa dokumento ang mga giya alang sa water supply interruptions. Nalatid nga dili mahimong maningil ang lokal nga water district o ang joint venture partner niini sa minimum charge kon napakyas kini sa paghatag og serbisyo sa kapin 15 ka adlaw.  Gidili usab ang pagputol sa koneksiyon sa tubig tungod kay wala makabayad ang konsumidor gumikan sa dugay’ng interruption. Ang LWUA guidelines gipakita ni Go ngadto kang MCWD Chairman Ruben Almendras ug gikompirma sa MCWD nga ilang nadawat ang circular ug nisaad nga mosunod sa palisiya lakip na ang pagtangtang sa minimum charge sa mga kwalipikadong kaso. Gipadayag usab ni Almendras nga daghang nangreklamo panahon sa bagyong Tino diin adunay mga lugar nga hapit usa ka buwan nga wala dayon mabalik ang agas sa ilang tubig.

Si Go niawhag sa MCWD nga ang mga bayad nga nakolekta na gikan sa mga kwalipikadong konsumidor ibalik pinaagi sa bill credit imbes nga cash refund. Ang maong sugyot ni Go nipalabang kini sa konseho sa siyudad.  BDB BANAT NEWS