Philippine women’s baseball team sibak sa World Cup
MANILA, Philippines — Matapos humataw ng dalawang sunod na panalo noong Miyerkules, dalawang dikit na kamalasan ang sinapit ng Philippine national women’s baseball team para tuluyang mamaalam sa WBSC Women’s Baseball World Cup Group Stage.
Yumukod ang World No. 21 Filipinas sa No. 5 Chinese Taipei, 0-4, bago minalas sa No. 5 Venezuela, 0-10, kahapon sa Asia-Pacific Secondary Field sa Tainan, Taiwan.
Nagtapos ang tsansa ng koponang makasama sa top three teams sa bawat grupo sa Taiwan, United States, Australia at Canada na maglalaro sa 2027 World Cup Final Stage sa Hulyo 19 hanggang 25 sa Rockford, Illinois.
Nauna nang natalo ang mga Pinay batters sa No. 1 Japan, 0-3, sa una nilang laban noong Martes.
Kinabukasan ay magkasunod na pinabagsak ng Filipinas ang No. 7 Cuba, 6-0, at No. 15 Great Britain, 6-2.
Ang nasabing demolisyon sa mga Cubans ang kauna-unahang panalo ng mga Pinay sa World Cup.
Laglag ang Nationals sa 2-3 kartada sa World Cup Group Stage.
Bumandera ang Japan bitbit ang 4-0 marka kasunod ang Venezuela (3-1) at Chinese Taipei (2-1), habang kulelat ang Cuba (0-3) at Great Britain (0-3).
Ang Japan, Venezuela at Chinese Taipei ang sasampa sa 2027 World Cup Final Stage.
- Latest
