Eala No.18 na sa WTA rankings

CEBU, Philippines — Si Alex Eala mikab-ot og laing makasaysayanong dungog sa iyang karera. Kini human ang garbo sa Pilipinas mikatkat og duha ka ang-ang sa kalibutanhong rankings sa women's tennis.

Ang 21-anyos nga si Eala milayat gikan sa No.20 ngadto No.18 sa labing uwahing WTA rakings nga gipagawas kagahapon lamang adlawa.

Uban ang 2,281 puntos, nalabyan ni Eala sila si Ekaterina Alexandrova sa Russia ug Jasmine Paolini sa Italy nga maoy nag-okupar karon sa ika-19 ug ika-20 nga puwesto.

Tataw nga makadugang kini sa motibasyon sa dili pa ang 2026 US Open, ang katapusan niyang  Grand Slam nga torneyo ning tuiga nga gikatakda gikan sa Agosto 30 ngadto sa Septiembre 13 didto sa USTA Billie Jean King National Tennis Center sa Flushing Meadows, New York.

Nindot kaayo ang salida ni Eala ning tuiga.

Pito na ka buok sa kasamtangang Top 10 players ang iyang gipangpildi. Si Eala nakaabot sa ikatulong hugna sa Wimbledon ug misakmit sa labing una niyang titulo sa WTA sa Washington Open.

Nindot sab ang gipakita niyang labok sa Canadian Open ingon man sa Cincinnati Open diin kanunay siyang dugokan sa fans ilabi na sa iyang mga kababayan.

Sa US Open, lain na sab nga kasaysayan ang tiradahan ni Eala.