Duha ka riders patay

CEBU, Philippines —  Duha ka motorcycle riders ang namatay sa managlahing aksidente sa dalan sa Naga City ug Sibonga niadtong Biyernes, Agosto 7, 2026.

Sa Naga City, patay ang 65-anyos nga rider human naligsan ug napasok sa ilawom sa usa ka cargo truck sa National Highway sa Barangay South Poblacion pasado alas-12:40 sa udto.

Giila ang biktima nga si Daniel Segura Robiato, minyo ug residente sa Purok Atis, Barangay Inuburan, City of Naga.

Si Robiato nagmaneho sa pula nga Honda Click, samtang ang puti nga  trak nga nalambigit sa insidente gimaneho ni Pablo Caayo Catipat, 53, residente sa Purok Matahimik, Sibala Village, Davao Oriental.

Base sa inisyal nga imbestigasyon sa City of Naga Police Station, parehong paingon sa habagatang bahin sa dakbayan ang motorsiklo ug truck. Gauna ang motor sa outer lane samtang ang truck gabiyahe sa inner lane. Pag-abot sa lugar sa  nahitaboan, giingong nakamatikod si Robiato sa usa ka naaberyang sakyanan nga nagmuntag og  Early Warning Device (EWD) maong nibalhin siya sa inner lane.

Apan naigo niya ang motorsiklo ug napasok kini ilalom sa trak ug naligsan kini hinungdan sa grabeng kadaut sa ulo ug kalawasan nga nahiaguman sa rider.

Gidala dayon si Robiato ngadto sa Vicente Mendiola Center for Health Infirmary apan gideklarar siyang dead on arrival sa mga doktor.

Ang driver sa truck gidala sa kapolisan ug gipaubos sa mandatory alcohol ug chemical testing subay sa Section 7 sa Republic Act No. 10586, o Anti-Drunk and Drugged Driving Act of 2013.

Sa laing insidente, usa usab ka motorcycle rider ang namatay samtang duha ang naangol human magbianggaay ang duha ka motorsiklo sa Vegetable Highway sa Purok 8, Barangay Kaulusan, Basak, Sibonga, pasado alas-7 sa buntag sa samang adlaw.

Giila ang namatay nga si alyas Rolando, 38, residente sa Barangay Sayao, Sibonga, ug drayber sa pula nga RUSI 125 nga motorsiklo.

Naangol usab ang drayber sa nakabangga niyang RUSI Bolt 125 nga giila nga si alyas Rene, ug ang iyang back rider niini nga usa ka menor de edad, parehong taga Kadampas, Purok 5, Barili.

Base sa imbestigasyon sa Sibonga Municipal Police Station, nagbiyahe si Rolando gikan sa Sitio Ongka, Barangay Sayao padulong sa Vegetable Highway sa Purok 8, Barangay Kaulusan, Basak. Samtang, si Rene ug ang iyang back rider gikan sa Barili padulong sa Barangay Libo, Sibonga.

Giingong miliko sa tuo si Rolando padulong sa dalan paingon sa Barili ug mitabok sa pikas lane. Niining higayona, padulong usab sa maong lugar si Rene, hinungdan nga nagbangga ang duha ka motorsiklo.

Tungod sa impact, nangatumba sa karsada ang duha ka drayber ug ang back rider. Gidala dayon ang tulo ngadto sa Carcar City District Hospital alang sa medikal nga pag-atiman apan gideklarar nga dead on arrival si Rolando. Padayon ang imbestigasyon sa kapolisan sa duha ka aksidente. (BANAT NEWS)