Magsuong Sing nikwestyon sa giatubang nilang kaso

CEBU, Philippines —  Gikwestyon sa tulo ka managsuong Sing ang mga kasong qualified theft nga ilang giatubang may kalabotan sa dugay nang panaglalis diha sa ilang pamilya bahin sa kung kinsay nanag-iya sa usa ka auto parts business sa Sugbo.

Matod sa ilang abogada nga si Atty. Marvi Irish Lim, dili lamang kini yano nga panaglalis bahin sa mga asset sa negosyo, kun dili usa ka away bahin sa panulondon ug kapalaran sa usa ka pito ka dekada ng family business.

Ang tulo ka giakusahan mao sila si Susana Yu Sing, Joseph Yu Sing ug Imelda Sing Copo gidakop sa mga otoridad human nalutsan og warrant of arrest niadtong adlaw nga Martes didto sa Moalboal.

 Sa pamahayag ni Lim, ang New Pioneer Auto Supply nagsugod pa niadtong dekada 1950 isip Cebu Pioneer Auto Supply  nga gipalambo sa pamilya Sing ubos sa ilang inahan nga si Juana Yu Sing  nga dunay siyam ka anak.

Matod ni Lim, si Arturo Sing ug iyang igsoon nga si Susana maoy nihatag og panahon sa ilang kinabuhi aron mapalambo ug mapadako ang maong negosyo.

“For more than seventy-six years, New Pioneer Auto Supply stood not merely as a commercial establishment, but as a symbol of the Sing family’s unity and shared aspirations,” matud ni Lim.

Una niini, ang mga kasong gisang-at batok sa magsuon nga gi-dismiss sa piskalya gibali sa Department of Justice (DOJ)  maong nalutsan sila og warrants.

Ang reklamo gisang-at sa biyuda ni Arturo nga si Anna Marie Sing ug sa ilang anak nga si Aaron kay illegal daw nilang gikuha ug gibaligya ang mga asset sa maong auto supply human sa pagkamatay ni Arturo niadtong Pebrero 2024. Nahikawan daw ang mga manununod ni Arturo sa ilang katungod sa inheritance.

Apan kusganon ning gihimakak sa iyang mga kliyente,  dili daw si Arturo lang ang nag-inusarang tag-iya sa maong auto supply kay kini family partnership nga gipadagan sa pamilya.

Tungod ani, nisang-at ang magsuong gidakop og civil case aron mangayo sa korte og judicial confirmation ug pag-ila sa maong partnership, lakip ang dissolution, winding up, liquidation ug distribution sa partnership assets, uban sa aplikasyon alang sa receivership. Matud ni Lim, gihatagan sa Commercial Court og pabor ang aplikasyon alang sa receivership human masusi ang mga ebidensiya nga gipresentar.

Para ni Lim,  ang lakang sa korte nagpakita nga giila niini ang proprietary interest ni Susana sa maong kompanya. 

Sa kauwahian, si Lim miingon nga ang korte ra gihapon maoy kataposang modesisyon kun kinsa gyuy tagiya sa maong negosyo ug kun duna bay krimen nga nabuhat ang managsuong gidakop. (BANAT NEWS)