CPTO: way rental fee alang, sa pasidungog sa Sugbo

CEBU, Philippines —  Nagpahimangno ang Kagamhanan sa Probinsiya sa Sugbo sa publiko batok sa mga indibidwal ug Facebook pages nga nagpaka aron-ingnon nga awtorisado sa pagkolekta og bayad alang sa concessionaire rental o booth reservation sa umaabot nga Pasidungog sa Sugbo.

Sa public advisory sa Cebu Provincial Tourism Office (CPTO), giila niini ang Facebook page nga “Kreativ Events&More Ph and Intl” isip usa sa mga dili awtorisado sa provincial government sa pagrepresentar niini kalabot sa maong kalihokan.

Matud sa CPTO, hangtod karon wala pay opisyal nga pahibalo bahin sa pag-abli sa aplikasyon alang sa mga concessionaire para sa Pasidungog sa Sugbo.

Giklaro usab sa tourism office nga walay rental fee o booth reservation fee nga gihisgutan, gi-aprobahan o gitugotan sa Cebu Provincial Government nga kolektahon alang sa maong kalihokan.

Tungod niini, gihangyo ang mga prospective concessionaire, negosyante ug ubang interesado nga magmatngon sa mga indibidwal o online pages nga mangayo og bayad ug moangkon nga konektado sila sa Capitol.

Matud sa CPTO, ang tanang opisyal nga pahibalo kalabot sa mga kalihokan sa provincial government, lakip na ang mga oportunidad alang sa concessionaire, ipagawas lamang pinaagi sa opisyal nga communication channels sa Cebu Provincial Government.

Ang maong isyu gitugyan na usab ngadto sa angay nga mga awtoridad alang sa imbestigasyon, sumala sa tourism office.