Ang pagbalik sa Queen of All Media

CEBU, Philippines — Hingpit na nga nibalik sa showbiz ang  “Queen of All Media” nga si Kris Aquino pinaagi sa iyang proyekto sa Netflix nga C.H.I.K.A. (Chief Head of Insights and Kontent Analysis), diin iyang ipaambit ang iyang mga obserbasyon kabahin sa mga eksena sa Filipino titles sa maong streaming platform.

Kini ang iyang comeback project human sa pipila ka tuig nga pagpahulay sa showbiz gumikan sa gihambin niya nga sakit.

Gikatakdang ipagawas ang mga episode niini sa Netflix karong  Agosto 7, 14, ug 20.

Acoya, milusad  sa “DUI”

Gilusad sa Filipino-Dutch singer-songwriter nga si Acoya ang  iyang bag-ong single nga “DUI,” ang iyang unang proyekto ubos sa ABS-CBN Music International (AMI).

Ang Los Angeles-based pop-R&B artist kay usa sa mga unang artist sa AMI, usa ka joint venture sa ABS-CBN Music ug ABS-CBN Global nga nagtumong sa pagdala sa talento sa mga Filipino ngadto sa international audience.

Gisulat ni Acoya kauban si Eric Bonner ang “DUI” nga madungog  na sa nagkalain-laing digital streaming platforms.

“Pangako” ni Kyle, mikisaw og balik

Misikat og balik ang 2018 dance-pop single ni Kyle Echarri nga “Pangako,” human kini mag-trending sa TikTok isip dance challenge ug lyric-video edits. Nakasulod usab ang maong awit sa  Billboard Philippines Hot 100, diin nahimutang kini sa No. 94.

Sa pagkakaron, nikulit na kini og  kapin 23 million streams sa Spotify, samtang ang official music video niini sa YouTube kay naa na sa kapin  14 million views.