Gitukod nga People`s Heritage Park hapit na mahuman

CEBU, Philippines — Ang P10.5 milyon nga People's Heritage Park nga gitukod sulod sa Capitol compound sa Sugbo gilauman nga mahimong dili lamang bag-ong pampublikong luna kondili usa usab ka proyekto nga makatabang sa pagpamenos sa pagbaha sa dakbayan.

Ang 2,000-square-meter nga parke karon padayon pang gitukod ug target mahuman sa bulan sa Septiyembre.

Sumala sa Cebu Provincial Government, ang People's Heritage Park himuong bukas sa publiko sulod sa 24 oras ug mahimong panig-ingnan sa paggamit sa green infrastructure aron makatabang sa pagdumala sa tubig-ulan.

Matud ni Executive Assistant V Elizar Sabinay sa Provincial Planning and Development Office (PPDO), dili ordinaryong parke ang gitukod sa Capitol.

Gipasabot ni Sabinay nga ang parke adunay mga permeable bricks nga mas dali mosuyop sa tubig kumpara sa ordinaryong konkreto. Giusab usab ang klase sa sagbot sa maong lugar aron mas mosuyop kini ug tubig panahon sa kusog nga ulan.

Lakip usab sa disenyo sa parke ang usa ka sunken area nga mahimong temporaryong tigomanan sa tubig-ulan. Ang tubig nga makolekta ipaagi ngadto sa drainage system.

Gawas sa flood mitigation, aduna usab kini'y jogging area, lugar alang sa mga bata ug senior citizens, coffee shop, glasshouse alang sa mga tigom, public comfort room, ug mga solar-powered nga pasilidad.

Ang pondo sa proyekto gikan sa Green, Green, Green Program sa Department of Budget and Management (DBM), ug gipasabot sa mga opisyal nga walay gigamit nga pondo sa Probinsiya alang sa maong project.  MEL BANAT NEWS