‘Pag-aresto’ kay Bato, diversionary tactic lang sa VP Sara trial - Malacañang

MANILA, Philippines — Isa umanong diversionary tactic ng mga kaalyado ni Vice President Sara Duterte ang mga kumakalat na pahayag na naaresto si Sen. Ronald “Bato” dela Rosa.

Ito ang paniniwala ng Malacañang para umano ilihis lang ang atensyon ng publiko sa development ng impeachment trial ni Duterte.

Hinikayat ni Palace Press Officer Undersecretary Claire Castro, ang publiko na huwag maniwala sa mga usap-usapan at alamin kung sino ang source at ang motibo ng mga nagpapakalat.

Mapapansin naman aniya na walang laman at walang konteksto ang pinapakalat nina Atty. Jimmy Bondoc at Harry Roque tungkol kay Senator Dela Rosa.

“Timing ang ginagawa nila para matabunan ang mga naisiwalat ng COA patungkol sa mga walang resibo na paggasta milyun-milyong pisong confidential funds ni VP Sara sa OVP at DepEd,” ayon pa kay Castro.