Kapin 3,000 violators nadakpan

Kapin sa 3,100 ka mga violators ang nadakpan sa Cebu Police Provincial Office (CPPO) ubos sa Safer Cities Initiative sulod sa lima ka adlaw nga operasyon gikan Hunyo 1 hangtod Hunyo 5, 2026 sa nagkalainlaing siyudad ug lungsod sa lalawigan sa Sugbo.

Base sa report sa CPPO, mikabat sa 3,122 ka mga violators ang nadakpan atol sa pagpatuman sa Oplan Bulabog, Oplan Sita ug Night Watch Operations nga nagtumong sa pagpalig-on sa pagpatuman sa mga lokal nga ordinansa, pagdugang sa police visibility ug pagmintinar sa kalinaw ug kahapsay sa mga komunidad.

Kadaghanan sa mga nakalapas mao ang City ug Municipal Traffic Ordinances nga mikabat sa 2,071 ka kaso. Gisundan kini sa 376 ka menor de edad nga nakalapas sa curfew hours, 371 ka tawo nga nasakpan nga nag-inom sa pampublikong lugar, 128 ka tawo nga nagsuroy sa pampublikong lugar nga walay sanina sa taas nga bahin sa lawas, 121 ka nakalapas sa smoking ordinances ug 28 ka kaso sa paggamit og karaoke lapas sa gitugot nga oras.

Sa Hunyo 1, 2026, mikabat sa 591 ka mga violator ang nadakpan sa gipahigayon nga anti-criminality operations sa CPPO, diin nakatigom og P189,500 nga multa ug silot atol sa maong adlaw nga operasyon.

Misunod niadtong Hunyo 2, 2026, nga nakarekord og 664 ka mga violator nga nadakpan, nga nakahatag og P162,300 nga fines ug penalties.

Sa Hunyo 3, 2026, mikabat sa 618 ka mga violator ang nasikop sa nagkalainlaing operasyon sa kapolisan, ug nakatigom og P166,850 nga multa ug silot.

Sa Hunyo 4, 2026, nadakpan ang 588 ka mga violator samtang nagpadayon ang Safer Cities Initiative sa tibuok probinsiya, nga nakahatag og P172,050 nga fines ug penalties.

Sa Hunyo 5, 2026, 661 ka mga violator ang nadakpan sa katapusang adlaw sa lima ka adlaw nga operasyon, nga nakatigom usab og P268,850 nga multa ug silot.

Sa maong lima ka adlaw nga operasyon, nakahimo usab ang mga police unit og 1,079 ka anti-criminality operations sa tibuok probinsiya.

Nakolekta usab sa kapolisan ang kinatibuk-ang P959,550 nga multa ug silot gikan sa mga operasyon, samtang adunay mga violator nga gipahimangnoan ug gibuhian subay sa mga umiiral nga lokal nga ordinansa.

Matud ni CPPO Director PCOL Abubakar Udang Mangelen Jr., kabahin sa ilang padayong kampanya ang maong operasyon aron mapalig-on ang disiplina sa komunidad ug malikayan ang kagubot ug uban pang posibleng kalapasan sa balaod.

Ang Safer Cities Initiative maoy usa ka programa sa Philippine National Police ubos sa kamandoan sa Department of Interior and Local Government (DILG) aron sa pagpalig-on sa pagpatuman sa mga lokal nga ordinansa ug pagdugang sa presensya sa kapolisan aron mapadayon ang kalinaw, kahapsay ug kaluwasan sa mga komunidad sa tibuok Sugbo.