Gidunggab sa iyang kainom
CEBU, Philippines — Usa ka 30-anyos nga lalaki ang naangol human gidunggab sa iyang kainom sa F.Cabahug Street, Barangay Kasambagan, Dakbayan sa Sugbo, niadtong Biyernes sa gabii, Hunyo 5, 2026.
Base sa inisyal nga imbestigasyon sa Mabolo Police Station, nakadawat sila og tawag gikan sa usa ka concerned citizen alas 8:15 sa gabii kabahin sa maong dinunggabay.
Subay sa report, ang biktima giila nga si Jack Bahinting Arco, 30, residente sa Barangay Casuntingan, Mandaue City.
Sa wala pa ang insidente, nag-inom ang biktima ug ang suspek daplin sa kalsada.
Atol sa ilang pag-inom, nagkainitay ang duha hangtod nga miresulta kini sa ilang panaglalis. Taliwala sa ilang panaglalis, kalit niibot og hinagiban ang suspek ug gidunggab ang biktima dapit sa tiyan niini ug dalidaling nidagan palayo.
Ang suspek giila nga si Eric Bohol nga padayun pang gipangita sa mga polis.
Daling miresponde ang mga personnel sa Cebu City Disaster Risk Reduction Management Office (CCDRMMO) ug gidala ang biktima sa Cebu City Medical Center (CCMC). (BANAT NEWS)
- Latest
