Namaligya’g paltik, nadakpan

CEBU, Philippines —  Nadakpan sa mga operatiba sa Criminal Investigation and Detection Group (CIDG) Mandaue City Field Unit ang usa ka 34-anyos nga lalaki atol sa buy-bust operation batok sa ilegal nga pagbaligya og armas sa Sitio Fatima, Barangay Jagobiao, Mandaue City, alas 9:53 sa gabii niadtong Hunyo 5, 2026.

Giila ang suspetsado nga si Josielloyd Glory Lisondra, residente sa Sitio San Roque, Barangay Mabolo, Cebu City. Ang operasyon gihimo ubos sa “Oplan Paglalansag Omega” sa CIDG Mandaue CFU uban sa kooperasyon sa Police Station 3.

Sumala PA sa CIDG, nasakpan si Lisondra nga aktuwal nga nagbaligya og usa ka caliber .38 revolver nga walay serial number ngadto sa poseur-buyer sa kapolisan, nga maoy hinungdan sa iyang pagdakop.

Narekober gikan sa suspetsado ang usa ka caliber .38 revolver nga maoy gibaligya, buy-bust money nga naglangkob sa usa ka tinuod nga P500 bill ug mga boodle money, ug usa ka eco bag nga gigamit isip sudlanan sa armas.

Wala makapakita ang suspetsado og bisan unsang lisensya o permit sa pagpanag-iya, pagdala, pagbaligya o pagbaligya og armas, nga maoy klarong paglapas sa Section 32 sa Republic Act 10591 o ang Comprehensive Firearms and Ammunition Regulation Act.  Gidala si Lisondra sa opisina sa CIDG Mandaue CFU alang sa hustong dokumentasyon ug pagsang-at sa kaso. (CEBU NEWS)