Higit 200 kawani ng online lending apps, inaresto
Nagpapanggap na mga PNP at NBI para makasingil…
MANILA, Philippines — Mahigit 200 kawani ng collection arm ng ilang online lending applications na nagpakilalang mga otoridad para makasingil sa mga may utang ang inaresto ng National Bureau of Investigation (NBI) sa isinagawang raid sa kanilang establisimyento sa Quezon City.
Sa pagsalakay ng NBI ay tumambad ang mga text blast equipment, SIM card, at gadget na ginagamit ng mga suspek.
Bumungad din sa mga cellphone at computer ang mga script ng pananakot at pekeng mensahe na galing umano sa PNP at NBI para takutin na magbayad ang mga may utang.
Ayon sa NBI, umano’y tinatakot ng mga empleyado ang mga may utang sa pamamagitan ng pagpapanggap na mga alagad ng batas at pagsasabing may inilabas ng warrant at iba pang legal na dokumento laban sa mga ito upang mapilitang magbayad ng utang.
“Tatakutin nila. Magpapanggap na mga law enforcers sila para bayaran. At magpapanggap din na may mga inisyu na warrant, bench warrant, at anu-ano pang mga dokumento para mapuwersa na magbayad,” ayon kay NBI Director Atty. Melvin Matibag.
Ang mga naaresto ay mahaharap sa iba’t ibang kaso kabilang ang ilegal na paggamit ng electronic devices, pagpapanggap bilang pulis, at pamemeke ng mga warrant at iba pang dokumento.
- Latest
