Utang kang Chiz

Bisan dili pa sila maisip nga mayoriya apan ang grupo nilang kanhi Senate President Tito Sotto milampos pagmaniobra aron makakuha og quorum ug makahimo sa ilang katapusang session ang Senado sa dili pa mo adjourn sine die.

Utang nila ang maong mahulagway nga kadaugan gikan ni Senador Chiz Escudero human mibutho kagahapon aron pagtambong sa session human sa duha ka adlaw nila nga wala pagtungha uban sa grupo nilang Senate President Alan Peter Cayetano.

Tungod ni Escudero nadugangan ang 11 ka sakop sa minoriya aron putlon ang deadlock ug makakuha og quorum. Apil ni Escudero nahimo na silang 12 kontra sa 10 nalang nga nahabilin sa kampo ni Cayetano human napriso na si Senador Jinggoy Estrada ug nagtago-tago si Senador Bato dela Rosa.

Bisan hinuon sa pag-uban ni Escudero sa karaang minoriya dili pa gihapon nila maabot ang gidaghanon sa gikinahanglang membro aron maisip nga bag-ong mayoriya ug makahimo sa pagpili og bag-ong presidente.

Kini tungod kay sigun sa Constitution, 13 ang gikinahanglan aron legal silang makapili og presidente sanglit ang kwentada sa majority “50-percent plus one” sa tanang sakop sa Senado.

Ug tungod kay 24 man kabuok ang Senador sa Pilipinas gikinahanglan nga dunay 13 ka membro ang maglangkob sa mayoriya. Sa kasamtangan maisip nga natunga ang Senado, 12-12.  Nakabintaha hinuon ang grupo nilang Sotto tungod kay ang duha sa pikas kampo dili man makahimo sa pagtambong sa session.

Apan bisan kun dili pa sila makahimo pagtudlo og permanenteng Senate president, apan wala say nakapugong nila nga ideklarar nga bakante ang lingkuranan niini ug ang tanang komitiba. Kini maoy hinungdan nga senate president pro-tempore ray napili kagahapon pinaagi ni Senador Sherwin Gatchalian.

Maisip nga crucial ang nahitabo kahagapon tungod kay kun wala pa moabot si Escudero dili makahimo pag-adjourn ang Senado sanglit giabandona man ni Cayetano ug sa iyang mga kauban ang ilang obligasyon pagtambong sa session sukad niadtong Lunes sa kahadlok nga mahulipan siya sa pwesto.

Ang pangutana, unsay nagtukmod ni Escudero nga talikdan ang kampo ni Cayetano?

Sigun sa mga tigpaniid sa politika, dako ang posibilidad nga nisugot na ang kanhi minoriya nga si Chiz maoy mahimong Senate president sa higayon nga makakuha na sila sa igong gidaghanon. Posible sab nga napugos si Chiz aron makalingkawas sa mga kasong iyang giatubang.