Archival: JO wala makasumite og dokumento aron masweldohan

CEBU, Philippines — Gipasabot ni Cebu City Mayor Nestor Archival, Sr. nga nalangan ang pagpagawas sa sweldo sa 956 ka job order employees dili tungod sa kakulang sa pundo sa siyudad apan tungod sa kalangay sa pagsumite sa gikinahanglang dokumento alang sa ilang payroll.

Ang mayor nagkanayon nga wala nagkuwang ang kagamhanan sa paghatag og alokasyon alang sa sweldo sa mga JO tungod kay andam na ang budget, accounting ug treasurer’s office sa pagpagawas sa maong sweldo kong masumite ang mga gikinahanglang dokumento.

Sa pakisusi ni Archival sa hinungdan sa maong problema nakita niini nga anaa mismo sa JO ang problema nga dili dayon makahuman ug makasumite sa ilang mga report nga maoy usa sa mga kinahanglanon alang sa pagproseso sa sweldo. Matud sa mayor nga mapagawas dayon ang sweldo sa higayon nga kompleto na ang tanang gikinahanglang papeles.

Aron malikayan ang susamang problema sa umaabot, nagpatuman na ang kagamhanan og mga reporma aron mapaspasan ang proseso sa dokumentasyon ug payroll.

Gibutyag ni Archival nga nag-andam na ang administrasyon og standard template alang sa JO employees aron mas sayon nilang matala ang ilang adlaw-adlaw nga gimbuhaton.

Sa ikaduhang bahin sa tuig, kong adunay malangan nanghinaot ang mayor nga dili na sama ang gidaghanon.

 Gisugyot usab sa mayor ang kamahinungdanon sa maayong record-keeping ilabi na kay adunay mga empleyado nga walay bisan notebook nga gamiton sa pagdokumento sa ilang mga trabaho.

Giawhag ni Archival ang tanang JO nga motabang sa pagpaayo sa sestema pinaagi sa pagsugod sa ilang kaugalingong pagpaninguha nga mosumite sa tukmang panahon sa mga gikinahanglan nga mga dokumento.

Ang maong isyu sa city hall dili lang sa administrasyon ni Archival nahitabo ug sa niaging semana pipila ka department heads usab ang gisugo sa pagsumite og mga suwat ngadto sa konseho aron mohatag og katin-awan kabahin sa mga nalangan nga project proposals ug uban pa’ng dokumentasyon. — BDB BANAT NEWS