Dyip tangka ang ika-2 dikit vs Bolts
Laro Ngayon(Smart Araneta Coliseum)
4:30 p.m. Columbian Dyip vs Meralco
7 p.m. Phoenix vs Blackwater
MANILA, Philippines — Matapos ang kanilang impresibong panalo ay haharap naman ang Columbian Dyip sa isang malaking hamon.
Target ang ikalawang sunod na panalo at ang pansamantalang pangunguna, lalabanan ng Dyip ang Meralco Bolts ngayong alas-4:30 ng hapon sa 2018 PBA Commissioner’s Cup sa Smart Araneta Coluseum.
“We’re up against a team that has been able to scout and prepare for us,” sabi ni Columbian coach Ricky Dandan sa Meralco ni one-time PBA Grand Slam champion mentor Norman Black.
Nagmula ang Dyip sa 126-98 paggupo sa Blackwater Elite kung saan humataw si Fil-Am guard Jerramy King ng career-high na 30 points.
Napantayan ng Columbian ang isang panalo nila sa nakaraang 2018 PBA Philippine Cup.
Ang naturang 28-point win ng Dyip laban sa Elite ang all-time largest margin para sa kanilang prangkisa mula sa naitalang 22 steals.
Patuloy namang hindi maglalaro para sa Bolts si veteran forward Ranidel de Ocampo (mild Achilles tear) habang nagagamit na ni Black sina Cliff Hodge at Jared Dillinger na parehong galing sa injury.
Muling ipaparada ng Meralco si balik-import Arinze Onuaku, naglista ng mga averages na 18.7 points, 17.3 rebounds at 1.5 blocks sa 17 games noong 2016 edition ng torneo.
Sa tulong ng 6-foot-8 na si Onuako, hinirang na PBA Best Import ay umabante ang Bolts sa semifinals.
Sa ikalawang laro sa alas-7 ng gabi, pipilitin naman ng Blackwater na makabangon mula sa kabiguan sa kanilang pagharap sa Phoenix.
Ipaparada ng Elite si balik-import Jarrid Famous, humakot ng 35 points at 22 rebounds sa kanilang kabiguan sa Dyip habang itatapat ng Fuel Masters si import James White.
- Latest
