Usa ka boto ra sa way kaatbang nga kandidato

CEBU, Philippines — Manginahanglan ra og usa ka boto ang kandidato nga walay kaatbang sa umaabot nga Barangay ug Sangguniang Kabataan (SK) Elections aron sila maproklamar nga mananaug.

Matud ni Atty. Ferdinand Gujilde, provincial election officer sa Sugbo, nga base sa balaud ang kandidato nga adunay labing dako nga boto maoy mapili sa posisyon.

“So if one vote is higher than zero kay wala kay kontra then that would be enough to get elected,” matud ni Gujilde.

Matud ni Gujilde nga mahimong itudlo ang ipuno sa bakanteng  posisyon.

Gitataw ni Gujilde nga “grey area” kini sanglit walay specific nga balaud kabahin sa pagtudlo alang sa position nga wala gilansaran.

Alang ni Gujilde nga mahimong ang mayor maoy motudlo kun kinsa ang molingkod sa bakanteng posisyon base usab sa rekomendasyon sa SK.

Sa balaud matud ni Gujilde makatudlo ang mayor kung mamatay ang usa ka konsehal, permanently incapacitated, ni-resign o ni-succeed sa mas taas nga posisyon.

“So akong take ana, it can be applied the analogy kay naa man permanent vacancy,” matud ni Gujilde.

Kung walay nilansar nga SK chairman o member sa barangay, matud ni Gujilde nga ang Department of Interior and Local Government (DILG) ang motudlo og officer-in-charge sa maong posisyon.

Samtang moabot sa 37, 892 ang opisyal nga nakaduso og CoC sa pagka-kapitan, konsehal, SK chairman ug SK member sa tibuok Lalawigan sa Sugbo. Base kini sa record sa Office of the Provincial Election Supervisor (OPES) sa Sugbo. (BANAT NEWS)