Peace covenant pasiugdahan sa Mandaue

CEBU, Philippines — Gitinguha karon sa Mandaue City Police Office (MCPO) ang pagpasiugda og hiniusang peace covenant alang sa tanang kandidato sa Barangay ug Sangguniang Kabataan (SK) Elections karong Mayo 14.

Si Police Senior Superintendent Roberto Alanas nga maoy director sa MCPO ang nagplano sa pagpasiugda niini aron mahimong hapsay ug malinawon ang umaabot nga piniliay.

Ang dakbayan nga adunay 27 ka barangay ang sagad nagpasubli ang mga naglingkod nga barangay kapitan ug giatbangan ang pipila kanila sa kanhi nila sakop sa konseho.

Samtang adunay pipila ka barangay sa Dakbayan sa Mandaue nga maoy niatbang kanila ang mga bag-o pa nga mga ngalan nga nitumaw sa natad sa politika sa pagtuo nga makahatag kini og maayong serbisyo.

Si Subangdaku Barangay Kapitan Ernie Manatad nga magpasubli usab sa iyang katungdanan ang nipadayag og hugot nga suporta sa maong peace covenant. Gipasabot niya nga iyang gisuportahan ang tinguha nga peace covenant bisan pa man nga iyang gituohan nga malinawon ang umaabot nga piniliay.

Dugang ni Manatad nga base sa iyang personal nga obserbasyon sa umaabot nga piniliay, iyang namatikdan nga labing malinawon tungod kay wala may giisip nga init nga panagsakbang.

Naglakip sa mga barangay nga giisip sa kapolisan nga init ang panag-atbang mao ang Pagsabungan tungod kay nakasinati man kini og reklamo sa mga sakop sa konseho nga niresulta sa pagka-suspenso sa kapitan. (BANAT NEWS)