Cyber pornography gironda

CEBU, Philippines — Ang hiniusang puwersa sa Cordova Police Station, Women and Children Protection  Center (WCPC) Visayas Field Unit  ug International Justice Mission (IJM) milampos sa pagsikop sa 20- anyos nga inahan diha sa usa ka sitio sa Barangay Ibabao, Lungsod sa Cordova kagahapon sa udto tungod sa matud pa pag-operate og cyber-pornography.

Ang nasikop base sa search warrant nga giluwatan sa korte mao ang 20 anyos nga single mother nga nagpuyo   sa maong dapit. 

Tulo ka minor nga mga babayeng giingong iyang gigamit sa online pornography ang naluwas.  

Si  Police Officer 3 Maria Lourdez  Cimafranca sa Women and Children Protection sa Cordova Police Station maoy kauban sa pagpangronda miingon nga nasakmit usab sa operasyon ang cellphone nga gigamit sa maong ilegal nga kalihokan.

Si  Mayor Therese Sitoy-Cho, daan na nagpahimangno sa mga lumolupyo sa nahisgotang lungsod sa pagdili pagkalambigit sa maong krimen ug gani may tanyag nga salapi kadtong makasumbong kon kinsa ang naghimo niini diha sa ilang lungsod. (BANAT NEWS)