“Way tugpa” nag-wild, asawa ug mga anak gipangdunggab

CEBU, Philippines — Usa ka amahan nga gikatahong ‘walay tugpa’ sulod sa upat na ka adlaw ang naghuramentado ug nanunggab sa pipila ka mga sakop sa iyang banay ug sa iyang ugangan alas-3 kagahapon sa kaadlawon diha sa Sitio Kabatuan, Barangay Pajac, Dakbayan sa Lapu-Lapu.

Ang mga biktima sa pagpanunggab mao sila si Maxima Redilla, 43, asawa sa suspetsado ug mga anak nilang nag-edad og  11 ug 14-anyos ug ugangan nga si Rufino Casayas. Samtang ang suspek giila nga si Desiderio Redilla, 39. Matud pa ni Police Officer 1 Jaymark Mullero, Desk Officer sa Mactan Police Station, sa wala pa ang insidente wala na sa maayong panimuot si Redilla, ug kagahapon samtang nangatulog ang sakop sa banay niini didto kalit kining nanunggab ug swerte nakamata ang asawa niini hinungdan nakapangayo og tabang.

Dugang pa ni Mullero,  niresponde dayon si Casayas apan giapil hinuon kini pagdunggab ni Redilla.

Gidala sa tambalanan ang mga biktima samtang gitabangan pagdakop sa mga silingan ug sa mga mirespondeng kapolisan si Redilla.

Si Redilla matud pa sa imbestigador nagselos sa iyang asawa kay nagtuo kining aduna kini uyab.

Apan sa dihang gikuhaan og pamahayag si Redilla kini niangkon nga tiggamitan og ilegal nga drugas ug katapusan niining gamit niadtong Huwebes hinungdan naglisod kini sa pagkatulog.

Ang mga residente sa lugar nitug-an nga niadtong Domingo namatikdan nilang hilom kaayo si Redilla hinungdan gipanaguan sa iyang pamilya ang mga sundang ug mahait nga hinagiban. Kutsilyo nga walay pulo-an nga ilang gibilin maoy gigamit niini sa pagpanunggab. (BANAT NEWS)