Romeo wala pa sa kondisyon

CEBU, Philippines — Giangkon ni kanhi scoring champion Terrence Romeo nga wala pa siya makapakita sa tinuoray niyang abilidad sa iyang unang duwa sa TNT KaTropa.

Si Romeo dismayado sa iyang 11 puntos diin upat lang sa 13 niya ka tira ang misud. Midaog hinuon ang TNT, 128-114 batok sa kanhi koponan ni Romeo nga GlobalPort Batang Pier.

Matud ni Romeo nga dali lang siya naka-adjust sa sistema ni coach Nash Racela, apan nakahatag niya og problema mao ang kakuwang sa hangin atol sa maong duwa.

Si Romeo taud-taod na nga wala makapakita og aksiyon tungod sa injury nga iyang naangkon sa miaging season.

Bisan pa niini, kontento ra  si Racela sa gipakita sa bag-o niyang player. (BANAT NEWS)