AC Troopers midaog gyud batok D’ Lurics

CEBU, Philippines — Milampos sa ilang misyon ang AC Troopers ubos sa liderato ni S/Insp. Dondon Coloscos pinaagi sa pagpukan sa D’ Lurics Enterprises, 63-52 sa Triple-A President’s Cup 2018 basketball tournament niadtong Domingo didto sa Kimwa gym sa Barangay Subangdaku, Mandaue City.

Mibida sa kadaogan si Raul Mahusay nga mibagnos og 13 puntos ug milangkat og unom ka rebounds sa AC Troopers nga nagtangkil na og 1-1  nga baraha.

Ang D’ Lurics nga wala pa’y daog sa duha ka duwa gipangulohan ni Geryl Bukiron nga mikamada og 15 puntos, gisundan ni Robert Cuerbo nga mihipos og 12 puntos. Wala sab magpaalkanse ang team manager nga si Dodong Lurica nga mitali og 10 puntos ug siya sab ang miiskor sa unang sayes  puntos sa iyang team sa first period.

Ang AC Troopers mipakita sa labing init nga duwa aron moposte og 45-22 nga bentaha sa halftime.

Apan ngilngig kaayo ang depensa sa D’ Lurics sa third period ug ilang nakandadohan ang AC Troopers sa tres puntos sa maong kuwarter hinungdan nga nakan-an  ang dakong labaw ngadto na lang sa singko puntos, 48-43 sa katapusang 10 minutos sa duwa.

Misamot kahinam ang aksiyon dihang nagligas na lang sa tres puntos ang iskor sa sayong bahin sa fourth period, 48-45 sa itsa ni Lurica, apan abtik kaayong nakasukli og mga puntos ang AC Troopers aron bingaton og balik ang ilang labaw ug wala na sila motugot nga makasikit pa ang D’ Lurics.

Sa laing aksiyon, ang Limasawa miiskor na sab og daog, ning higayona batok sa team Lesin, 70-70.

Si Eman Pacquiao mikulit og 24 puntos, samtang si Bernard Flores mitampo’g 14 puntos sa Limasawa nga wala na molingi pa human nakuha ang 21-19 nga bentaha sa second quarter.

Sila si Reyden Villaronza ug Tim Cabrera nagtampohay og 10 puntos sa Limasawa nga aduna na’y 2-0 nga baraha.

Ang team nga si Gilbert Lesin mirehistro og game-high 32 puntos aron pangulohan ang iyang koponan nga wala pa sa’y daog sa duha ka duwa ning maong liga  nga ubos sa pagtugot sa  president niining si Alan Buenavista ug ni bise presidente  Dodong Lurica. Ang mga duwa ubos sa superbisyon ni league commissioners Geryl Bukiron ug Ramil Baclay sa abag nilang Lahug Brgy. Capt. Dodong Taborada, Christopher ‘Crismart’ Martininto ug Orly Navarro.

Puntos matag usa

Unang duwa:

AC Troopers (63) – Mahusay 13, Ocier 9, Coloscos 6, Yares 6, Romagos 6, Englis 5, Ferolino 3, Ecot 3, Cabahug 3, Oquias 3, Acusar 2, Pestaño 2, Limosnero 2.

D’ LURICS (52) – Bukiron 15, Cuerbo 12, Lurica 10, Yatan 5, Manatad 4, Arceo 3, Yamomo 2, Taborada 1.

Ikaduhang duwa:

LIMASAWA (79) – Pacquiao 24, Flores 14, Villaronza 10, Cabrera 10, Sabang 8, Monternel 6, Palero 2, Lugas 2.

LESIN (70) – Lesin 32, Quijano 17, Montalban 9, Balicog 4, Banate 2, Armamento 2, Varro 2. (BANAT NEWS)