Tag-iya sa CCT builders nag-wild

CEBU, Philippines — Nag-wild ug wala kapugngi sa iyang pagmangtas si Engr. Chucho Tan, kinsa mipakita sa labing maayo  niyang labok  sa Cebu Legends Basketball Association Third Conference basketball tournament.

Si Tan mipahaguros og 15 puntos aron aswaton ang iyang team CCT Builders nga mipilde sa Explorer, 84-75 niadtong Sabado didto sa Canduman Housing gym, dakbayan sa Mandaue.

Gawas ni Tan, nanghasi sab si Francis Palero nga mipatuasik og 14 puntos, ingon  man sila  si Richard  Madrid ug Roy Ermac nga nagkumboya’g 23 puntos sa CCT Builders nga mipauwan og siyam ka 3 pointers sa maong duwa.

Kontrolado sa CCT Builders ang duwa ug bugtong konsuylo sa Explorer mao ang pagtabla sa iskor, 52-all sa  third  period  sa  itsa sa team manager niining si Alan Buenavista. Katapusang nakatabla ang Explorer, 58-58 kay si Eboy Quiñahan milansang og upat ka sunod-sunod nga puntos.

Si Richard Aseo mikabkab og 11 puntos ug mao lang ang miiskor og double figures sa Explorer nga wala gyud kalabaw sa maong duwa.

Ang CCT Builders ug Explorer parehong nagbitbit og 1-1 records.

Sa pasiunang duwa, ang Butch Surveying miposte sa ilang ikaduhang sunod-sunod nga daog human nila ihawa ang SIBA Tigers, 93-80.

Nagkumbinar og 29 puntos sila si Raul Mahusay ug Roland Castillo aron mangu sa Butch Surveying ni Engr. Butch Migriño.

Si Alan Federez mao sab ang nangu sa SIBA Tigers ni Jennifer Velasco  sa iyang 18 puntos.

Ang Butch Surveying ni coach Tony Alcover aduna na’y 2-0 record ning maong liga  nga namugna pinaagi sa paningkamot sa  aktibong  presidente nga si S/Insp. Dondon Coloscos.

Puntos Matag Usa

Unang duwa:

BUTCH Surveying (93) – Mahusay 15, Castillo 14, Aligway 11, Suson 10, E. Alcover 8, Gonzaga 7, B. Herbieto 6, T. Alcover 5, Cabonelas 5, Cabucos 4, Migallen 4, Pilit 4.

SIBA Tigers (80) – Federez 18, Bathan 14, Molina 12, Marabi 10, Judilla 9, Gomez 5, Colina 5, Alinabon 3, Catinoy 2, Marano 2.

Ikaduhang duwa:

CCT Builders (84) – Tan 15, Palero 14, Madrid 12, Ermac 11, Solana 8, Cena 6, Bucabal 6, G. Flores 4, Quiñahan 4, Goc-ong 2, J. Flores 2.

EXPLORER (75) – Aseo 11, Setenta 8, Molit 8, Amancio 7, Gomez 6, Costanilla 6, Ferolino 6, Buenavista 6, Puerto 4, Tion 2, Yares 2, Limosnero 2, Ochea 2, Rama 2, Medillo 2. (BANAT NEWS)