Bogut moduwa sa Sydney Kings

CEBU, Philippines — Gikompirmar sa beteranong sentro sa NBA nga si Andrew Bogut nga mobalik siya sa Australia aron moduwa alang sa Sydney Kings.

Pinaagi sa iyang Twitter, ang 33-anyos si Bogut mipahibawo nga iya  nang isumiter ang mga gikinahanglang papeles ngadto sa National Basketball League.

Sa miaging bulan, si Bogut mipahibalo nga dili na siya mobalik pa alang sa nahibiling bahin sa NBA 2017-2018 season gumikan kay gusto niyang magpabilin sa Australia aron maka-atiman sa nagsabak niyang asawa.

Si Bogut maoy nahimo nga labing unang Australyano nga No. 1 overall pick sa NBA Draft sa dihang gipili siya sa Milwaukee Bucks niadtong 2005.

Human sa pito ka tuig sa Bucks, gi-trade siya ngadto sa Golden State Warriors diin siya nakadaog og kampiyonato niadtong 2015.

Si Bogut gilabay ra sab dayon ngadto sa Dallas Mavericks sa sunod nga tuig ug human sa usa ka season mitikang siya sa Cleveland diin naangol ang wala niyang tiil pipila pa lamang ka segundos ang mipitik atol sa iyang Cavs debut.

Sa naghinapos nga bahin sa miaging tuig, si Bogut mipirma og kontrata uban sa Los Angeles Lakers, apan gi-waive ra sab dayon siya niini. (BANAT NEWS)