Spurs buhi pa, Cavs, Bucks, Wizards nakatabla

CEBU, Philippines — Nakaangkon pa og laing kinabuhi ang San Antonio Spurs, samtang ang Cleveland Cavaliers, Milwaukee Bucks ug Washington Wizards nakatabla batok sa tagsa-tagsa nila ka mga kaatbang sa unang hugna sa ‘best-of-seven’ NBA playoffs kagahapon.

Si Manu Ginobili miiskor og 10 sa iyang 16 puntos sa katapusang kuwarter sa dihang ang Spurs mibuntog sa Golden State Warriors, 103-90 aron paglikay nga ma-sweep sa serye samtang wala pa uban kanila si coach Gregg Popovich nga nagbangutan pa sa kamatayon sa kapikas niyang si Erin.

Miposte si LaMarcus Aldridge og 22 puntos ug 10 ka rebounds, apan ang bida sa ilang kadaogan mao ang 40-anyos nga si Ginobili, kinsa mibutyag nga mohukom siya sa off-season kun mobalik pa ba siya alang sa ika-17 niyang season sa Spurs.

Didto sa Indiana, si LeBron James mipatuasik og 32 puntos sa dihang ang Cavs mibawos sa Pacers, 104-100 aron pagtabla sa ilang serye, 2-2.

Milangkat sab si James og 13 ka rebounds ug pito ka assists sa ika-100 niyang duwa sa playoffs diin siya mopuntos og dili momenos sa 30. Miabag kaniya si Kyle Korver nga miposa og upat ka tres sa iyang 18 puntos. Ang Pacers naglabaw og dos puntos, 93-91, apan sila si James ug Korver milusad og 10-2 run aron pagpaabante sa Cavs, 101-95 sa katapusang 1:52 sa duwa.

Wala sab magpabitin si Giannis Antetokounmpo nga mikadlit og 27 puntos, apil na ang krusyal niyang basket sa nahibiling singko segundos sa duwa aron pagtuboy sa Milwaukee Bucks ngadto sa kulbahinam nga  kadaogan batok sa Boston Celtics,  104-102  sa Game 4.

Duna pa unta’y tsansa nga modaog ang Celtics, apan si Marcus Morris nasipyat sa iyang 14- footer dayong kapupos sa oras. Si Jaylen Brown maoy nangu sa Celtics uban ang 34 puntos.

Didto sa Washington, nakatabla sab ang Wizards sa baraha nga 2-2 dihang ila na sab nga gipilde ang Toronto Raptors, 106-98  didto sa ilang balwarte.

Human ma-fouled out si Bradley Beal, si John Wall maoy misalida pinaagi sa pagkolekta og 10 sa katapusang 14 puntos sa Wizards dayon na ngadto sa paghipos og  kinatibuk-ang 27 puntos   uban ang 14 ka assists.

Si Beal mihipos og 31 puntos sa wala pa mibiya sa korte human matawgi sa ikaunom niyang foul sa katapusang singko minutos.

Si DeMar DeRozan mihipos og 35 puntos, unom ka assists ug unom ka rebounds, samtang si Kyle Lowry dunay 19 puntos sa pilderong Toronto. (BANAT NEWS)